थानकोट ।

श्रीलंकामा जारी साफ यू-१७ पुरुष फुटबलमा नेपालले आफ्नो दोश्रो खेलमा आज भारतको सामना गर्दैछ ।

कोलम्बोको रेस कोर्स ग्राउण्डमा नेपाली समय अनुसार दिउँसो ३ः४५ बजे नेपाल र भारतबीचको खेल सुरु हुनेछ ।

आज नेपाल भारतलाई हराउँदै समूह विजेता बन्दै सेमिफाइनलमा पुग्ने योजनामा रहँदा भारतपनि नेपाललाई हराएर समूह विजेता बन्न चाहन्छ ।

समूह ‘बी’ मा रहेको नेपाल र भारत यस अघि नै सेमिफाइनल पुगिसकेको छन् । ३ अंक जोडेको नेपाल समूहको दोस्रो र भारत शीर्ष स्थानमा रहेको छ ।

नेपालले पहिलो खेलमा भुटानलाई २-१ गोल अन्तरले हराएको थियो । भारतले पनि भुटानलाई ३-० ले हराएको थियो । दुवै खेलमा हार व्यहोरेको भुटान प्रतियोगिताबाट बाहिरिसकेको छ ।

यू-१७ अन्तर्गत नै शुक्रबार हुने दोस्रो खेलमा श्रीलंका र माल्दिभ्स भिड्ने छन् ।

प्रतियोगितामा सहभागी ६ टोलीलाई दुई समूहमा विभाजन गरिएको छ । समूहको शीर्ष दुईले सेमिफाइनलमा स्थान बनाउने छन् ।