थानकोट, चैत्र ३ ।

युनाइटेड कप ब्याडमिन्टनको उपाधि सुरेन्द्र बोहरा र आयुष श्रेष्ठको जोडीले उचाल्न सफल भएका छन् । चन्द्रागिरी नगरपालिका–१२ काे युनाइटेड स्पाेर्टस क्लबद्वारा फागू पूर्णिमाको अवसरमा बिहीबार आयोजना गरिएको प्रथम युनाइटेड कप ब्याडमिन्टन प्रतियोगिताको उपाधि बोहरा र श्रेष्ठको जोडीले उचालेका हुन् ।

प्रतियोगितामा सुरेन्द्र र श्रेष्ठको टिमले प्रथम स्थान हासिल गर्दा सुरज पाेखरेल र कमल खड्काकाे जोडीले द्वितीय स्थान हासिल गर्न सफल भए । प्रतियोगितामा ३२ टिमले सहभागिता जनाएका थिए । विजेतलगायतका खेलाडी टोलीलाई ट्रफी, मेडल र प्रमाण-पत्र वितरण गरिएको थियो ।

क्लबका अध्यक्ष नारायणप्रसाद सिग्देलले प्रतियोगिता अवधिभर सहयोग गर्ने सबैलाई धन्यवाद दिँदै आगामी दिन यस्तै कार्यक्रम गर्न थप हौसला पुगेको बताए । राष्ट्रको गहना मानिने खेलकुद स्वास्थ्यका हिसाबले झनै महत्वपूर्ण रहेको उनको भनाइ थियो ।

यसैगरी क्लबका संरक्षक राजकुमार पोख्रेलले खेलकुदले मानिसलाई अनुशासित र तन्दुरुस्त बनाउने बताए । यसकारण पनि खेलकुद सबैका लागि अपरिहार्य रहेकाे उनले जाेड दिए ।

प्रतियोगितामा चन्द्रागिरी नगरपालिकाका प्रमुख घनश्याम गिरी, वडा नम्बर १२ का अध्यक्ष प्रकाश श्रेष्ठ, थानकोट प्रहरी बृतका प्रमुख डिल्ली नारायण पाण्डे, बलम्बु प्रहरी प्रमुख गणेश कोइरालालगायत विभिन्न सामाजिक ब्यक्तिहरुको उपस्थिति रहेको थियो ।

कार्यक्रममा उपस्थित नगर प्रमुख गिरीले प्रतियोगिताले मानिसको शारीरिक र मानसिक रुपमा तन्दुरुस्ती बढ्ने बताउँदै प्रतियोगिताको प्रशंसा गरेका थिए ।