थानकोट ।

चन्द्रागिरि नगरपालिका- ४ थानकोट बजारमा एक पुरुषले एक महिलामाथि चक्कु प्रहार गरेका छन् ।

शुक्रबार साँझ चक्कु प्रहारबाट दाङ घर भई थानकोट बस्ने सीता पुन घर्ती गम्भीर घाईते भएकी छन् । घाईते पुनकाे महांकालस्थानस्थित ट्रमा सेन्टर उपचार भइरहेको छ । उनको अवस्था गम्भीर रहेको प्रहरी वृत्त थानकोटले जनाएको छ । घर्तीले थानकोटमा तरकारी पसलको व्यवसाय गर्दै आएको बताइएको छ ।

चक्कु प्रहार गर्ने राेल्पाका चन्द्रबहादुर खत्री प्रहरी नियन्त्रणमा छन् ।

चक्कु हानेर भागेका खत्रीलाई प्रहरी वृत्त थानकोटका प्रमुख प्रहरी नायब उपरीक्षक सुर्यप्रकाश सुवेदीको कमाण्डमा खटिएको प्रहरी टोलीले नियन्त्रणमा लिएको हो ।

घटनापछि थानकोट क्षेत्रमा भीड लागेको प्रत्यक्षदर्शीले जानकारी दिए ।

ती दुवैबीच यसअघिबाट नै चीनजान रहेको प्रारम्भिक अनुसन्धानबाट खुलेको प्रहरीको भनाइ छ ।