थानकोट ।

नेकपा एमालेको केन्द्रीय कार्यालय कीर्तिपुर नगरपालिका-२ मैत्रीनगरमा बन्ने भएको छ ।

शुक्रबार सो पार्टीका अध्यक्ष तथा प्रधानमन्त्री केपी शर्मा ओलीले पार्टीको नयाँ भवन निर्माणको शिलान्यास गरेका छन् ।

मदन भण्डारी स्मृति भवनको नाममा एमालेको पार्टी केन्द्रीय कार्यालयको शिलान्यास गरिएको हो ।

भाटभटेनी सुपर मार्केटका सञ्‍चालक मीनबहादुर गुरुङ र सावित्री गुरुङले दान दिएको १० रोपनी १४ आना जग्गामा एमालेको अत्याधुनिक भवन बन्न लागेको एमालेका महासचिव शंकर पोखरेलले जानकारी दिए ।

भवन एकवर्ष भित्र बनिसक्ने र अर्को दशैंको घटस्थापनाको दिन भवन हस्तान्तरण गरिने गुरुङको भनाइ छ।

१० रोपनी १४ आना जग्गामा एमालेको अत्याधुनिक भवन बन्न लागेको हो ।

एमालेको हाल केन्द्रीय कार्यालय रहेको ललितपुरको च्यासलस्थित तुल्सीलाल स्मृति प्रतिष्ठानमा बाढीले क्षति पुर्‍याएपछि चन्द्रागिरि र कीर्तिपुरको सीमा क्षेत्र मैत्रीनगरमा नयाँ कार्यालय भवन बनाउन लागिएको हो ।

सञ्चारकर्मीहरूको प्रश्नमा व्यावसायी गुरुङले आफूले अन्य पार्टीलाई पनि सहयोग गर्दै आएको तथा आफू पहिल्यैदेखि एमाले निकट रहेकोले एमालेलाई सहयोग गर्न पाउनु एक अवसर भएको बताए । उनले आफूले अन्य पार्टीका लागि पनि सहयोग गरिरहेको बताए ।

पार्टी मुख्यालय भवनको शिलान्यासका क्रममा नेकपा एमालेका शीर्ष नेताहरूको बाक्लो उपस्थिति रहेको थियो ।