थानकोट।

चन्द्रागिरि नगरपालिका-०६ मातातिर्थ बालागाउँस्थित खेल मैदानमा जारी तेस्रो संस्करणको मातातिर्थ गोल्डकप फुटबल प्रतियोगितामा एभरेष्ट युथ क्लबले वीआर ब्रदर्शविरूद्ध संघर्षपूर्ण जित हात पारेको छ।

मंगलबार सम्पन्न प्रिक्वाटर फाइनल खेलमा एभरेष्ट युथ क्लब बालागाँउले थानकोटको वीआर ब्रदर्शलाई १-० गाेल अन्तरले पराजित गरेको हो । जितसँगै एभरेष्टले सेमीफाइनलमा स्थान सुरक्षित गरेको छ ।

भोलि बुधबार हुने दि हिलिङ युवा क्लब र मिलन युथ क्लबबीचको खेलको विजेतासँग एभरेष्टले असोज १८ गते सेमीफाइनल खेल खेल्ने तालिका रहेको छ।

प्रतियोगिता अन्तर्गत भोलि बुधबार दुई खेल हुनेछन् । जसमा दिनको पहिलो खेलमा समतामुलक युवा क्लब र सिद्धीकाली युवा क्लब बिहान ११ बजे प्रतिस्पर्धा गर्नेछन् । यो खेलको विजेताले अन्तिम चारको टिकट काट्ने छ ।

दिनको दोश्रो तथा अन्तिम खेलमा दिउँसो २ बजे दि हिलिङ युवा क्लब र मिलन युथ क्लबबीच प्रतिस्पर्धा हुनेछ ।

प्रतियोगिताको विजेताले नगद ४ लाख रूपैयाँ, ट्रफी, मेडल र प्रमाणपत्र पाउनेछ ।

दोश्रो हुने टोलीले २ लाख ५० हजार रूपैयाँ ट्रफी, मेडल र प्रमाणपत्र पाउनेछ । यस्तै तेस्रो स्थान प्राप्त गर्ने टोलीले १ लाख ५० हजार रूपैयाँ, ट्रफी, मेडल र प्रमाण पत्र प्राप्त गर्दा उत्कृष्ठ टोलीले २० हजार प्रोत्साहन रकम पाउनेछ ।

व्यक्तिगत विधातर्फ सर्वोत्कृष्ठ खेलाडी, सर्वाधिक गोल कर्ता, उत्कृष्ठ डिफेन्डर र उत्कृष्ठ गोल रक्षकले नगद १० हजार रूपैयाँ, ट्रफी, मेडल प्राप्त गर्नेछन् ।

सेमीफाइनल खेल असोज १८ गते खेलाइने छ भने तेस्रो स्थान र फाइनल खेल असोज १९ गतेका लागि तय भएको बताइएको छ ।

मातातिर्थ संरक्षण तथा विकास संस्थाको आयोजनामा प्रतियोगिता सञ्चालन भएको हो ।