थानकोट।

त्रिभुवन विश्वविद्यालयको समाजशास्त्र केन्द्रीय विभागका प्रा.डा.चिरञ्जीवी आचार्यलाई बिहीबारदेखि लागू हुने गरी मानविकी तथा सामाजिक शास्त्र संकायको सहायक डीनमा नियुक्त गरिएको छ ।

त्रिविका उपकुलपति प्रा.डा.शिवलाल भुसालले प्रा.डा.चिरञ्जीवी आचार्यलाई बिहीबार मानविकी तथा सामाजिक शास्त्र संकायको सहायक डीनमा नियुक्त गर्नुभएको हो ।

काठमाडाैं शिक्षा क्याम्पसको सम्मान

यसैबीच चन्द्रागिरि नगरपालिका १० सतुगंलस्थित काठमाडाैं शिक्षा क्याम्पसले त्रिवि मानविकी तथा सामाजिक शास्त्र संकायका नवनियुक्त सहायक डीन प्रा.डा.चिरञ्जीवी आचार्यलाई सम्मान गरेको छ ।

शुक्रबार बिहान क्याम्पसमा संयोजित एक समारोहका बीच क्याम्पस प्रमुख शत्रुध्नप्रसाद गुप्ताले सहायक डीन प्रा.डा.चिरञ्जीवी आचार्यलाई सम्मान गर्नुभएको हो ।

सम्मानपछि संक्षिप्त प्रतिक्रिया दिनुहुँदै नवनियुक्त सहायक डीन प्रा.डा.चिरञ्जीवी आचार्यले क्याम्पसप्रति आभार व्यक्त गर्नुहुँदै शुक्रबारबाट सुरु भएको क्याम्पसको खेलकुद सप्ताहका लागि शुभकामना दिनुभयो ।

नवनियुक्त सहायक डीन प्रा.डा.चिरञ्जीवी आचार्यले क्याम्पसमा शुक्रबारबाट सुरु भएको सप्ताहव्यापी खेलकुद कार्यक्रमको समेत उद्घाटन गर्नुभएको थियो । खेलकुद सप्ताह अन्तर्गत भलिबल, टेबलटेनिस, ब्याडमिन्टन लगायत खेलका स्पर्धा हुने बताइएको छ ।