थानकोट, फागुन १५ गते ।

फागुन २१ गते शनिबार चन्द्रागिरि नगरपालिका १२ बलम्बुमा हुने चन्द्रागिरि नगरका पुराना तस्बिरहरूको प्रदर्शनीलाई बलम्बु सहकारी समुहले साथ दिने भएको छ । फोटो म्युजियम नेपालको संयोजन एवं थानकोट टाइम्सको मुल प्रायोजनमा आयोजना भइरहेको पुरानो चन्द्रागिरि फोटो प्रदर्शनी-२०७८ अन्तर्गत फागुन २१ गते बलम्बुस्थित हसना भास्तिपुर साकोस परिसर (लाछी) मा उक्त कार्यक्रम हुनेछ । बलम्बु सहकारी समुहका अध्यक्ष सत्यराज श्रेष्ठले चन्द्रागिरि नगर क्षेत्रका पुराना तस्बिरहरूको प्रदर्शनीमा समुहको साथ सदैव रहने धारणा राख्नुहुँदै कार्यक्रममा सहभागिताका लागि सबैमा अनुरोध गर्नुभएको छ ।

यसअघि चन्द्रागिरि स्पोर्टस् क्लबसँगको साझेदारीमा फागुन १४ गते चन्द्रागिरि-१३ पुरानो नैकाप चोकमा यस क्षेत्रका १२० वटा पुराना तस्बिरहरूको प्रदर्शनी आयोजना गरिएको थियो जसमा स्थानीयहरूको उत्साहजनक उपस्थिति पाइएको थियो । चैत्र ५ सम्म आयोजना हुने यस फोटो प्रदर्शनी चन्द्रागिरि नगरका विभिन्न क्षेत्रमा हुने तालिका निर्धारण गरिएका छन् ।