थानकोट ।

विद्यार्थीमाथि कुटपिट गरेको आरोपमा चन्द्रागिरि नगरपालिकामा एक जना शिक्षक पक्राउ परेका छन्।

बिहीबार चन्द्रागिरि नगरपालिका-१ दहचोकस्थित श्रीकृष्ण माध्यमिक विद्यालयका शिक्षक एकराज पण्डितलाई प्रहरीले पक्राउ गरेको हो।

उनलाई पक्राउ गरेको जिल्ला प्रहरी परिसरका एसपीका सीताराम रिजालले पुष्टि गरेका छन्।

पण्डितले कक्षा ८ मा पढ्ने छात्रा अस्मिता परियारमाथि कुटपिट गरेको आरोप छ।

प्रहरीका अनुसार शिक्षक पण्डितले दिउँसो ३ बजे कक्षामा छात्राको कानमा हिर्काएका थिए।

कुटपिटबाट बेहोस भएकी अस्मिताको ओम समाज अस्पतालमा उपचार जारी छ।

अहिले उनको होस खुलिसकेको छ। शिक्षकले कुटपिट गरेपछि विद्यालयले छात्राका परिवारलाई बोलाएर प्रहरीलाई खबर गरेको थियो।

उसो त सो विद्यालयमा कार्यरत शिक्षकहरू बीचसमेत पटक पटक विवाद उत्पन्न हुँदा नगर कार्यपालिकामा सो विषयले प्रवेश पाइसकेको बताइएको छ ।