थानकोट । 

त्रिभुवन विश्वविद्यालय अनुदान आयोगको उच्च शिक्षामा उत्कृष्टताको प्रवर्द्धन कार्यक्रमका लागि चन्द्रागिरि नगरपालिका १० सतुंगलस्थित काठमाडाैं शिक्षा बहुमुखी क्याम्पससहित देशभरबाट ७९ वटा क्याम्पसहरू छनोटमा परेका छन् । 

विश्वविद्यालय अनुदान आयोग र विश्व बैंकको सहकार्यमा संचालित तेस्रो चरणको कार्यक्रम उच्च शिक्षामा उत्कृष्टताको प्रवर्द्धनमा काठमाडाैं शिक्षा बहुमुखी क्याम्पसपनि छनाैट भएको क्याम्पस प्रमुख शत्रुध्नप्रसाद गुप्ताले जानकारी दिनुभयो । क्याम्पसबाट अनुदान आयोगमा परेको  प्रस्तावनाको आधारमा अनुदान आयोगले ती क्याम्यसहरूलाई छनाैट गरेको हो ।

यस परियोजनामा छनोट भएका क्याम्पसहरुले भौतिक पूर्वाधार विकास, अनुसन्धान प्रवर्द्धन, वातावरण अनुकुल पूर्वाधार विकास, क्याम्पसभित्र सुचना प्रविधि पूर्वाधारको विकास, ट्रेसर स्टडी, विद्यार्थी नतिजा सुधार, विज्ञान तथा कम्प्युटर प्रयोगशाला निर्माण र शिक्षक कर्मचारीको क्षमता विकास लगायतका कार्यक्रममा वित्तिय अनुदान सहायता प्राप्त लगायतका कार्य गर्न सकिने क्याम्पस प्रमुख गुप्ताले जानकारी दिनुभयो । 

उहाँका अनुसार परियोजनाबाट प्राप्त हुने सहयोग रकम परिणाममा आधारित रहेको छ, तसर्थ क्याम्पसहरुले कुनै कार्यक्रम सम्मन्न गरि त्यसको प्रतिवेदन बुझाएपश्चात त्यसमा लागेको सम्पुर्ण खर्च विश्वविद्यालय अनुदान आयोगमा दाबी गर्न सक्छन र नियामअनुसार भुक्तानी प्राप्त गर्न सक्छन् । क्याम्पस प्रमुख गुप्ताले क्याम्पसले पाएको यो अवसरलाई सहि रुपमा प्रयाेग हुने कुरामा विश्वास व्यक्त गर्नु भयो ।

विश्वविद्यालय अनुदान आयोगले उच्च शिक्षामा उत्कृष्टताको प्रवर्द्धन शीर्षकमा १ अर्ब २० करोड रूपैषाँ बजेट विनियोजन गरेको छ । यो कार्यक्रम पाँच वर्षसम्म सञ्चालन हुनेछ ।