थानकोट ।

चन्द्रागिरि वडा नं. ९ लाई ५-१ ले पराजित गर्दै चन्द्रागिरि नगरको सर्वाधिक पुरस्कार राशीको चन्द्रागिरि नगरपालिका वडास्तरीय फुटसल प्रतियोगिताको उपाधि चन्द्रागिरि वडा नं. १५ ले चुमेको छ ।

 उपाधी विजेता चन्द्रागिरि नगरपालिका वडा नंं. १५ तीनथानाले नगद ८० हजार रूपैयाँ हात पार्दा दोश्रो भएको चन्द्रागिरि नगरपालिका वडा नं. ९ मच्छेगाउँ ४० हजारमा चित्त बुझाउन बाध्य भयो । 

वेष्टर्न यूनाइटेड क्लबको संयोजन तथा चन्द्रागिरि नगरपालिकाको मुल प्रयोजनमा आयोजित प्रतियोगितामा चन्द्रागिरि नगरपालिकाका १५ वटै वडाका २२ टोलीले सहभागिता जनाएका थिए । 

प्रतियोगितामा विजेता तथा उपविजेता एवं विधागत रूपमा उत्कृष्ठ हुने टोली तथा खेलाडीहरूलाई चन्द्रागिरि नगरपालिकाका मेयर घनश्याम गिरी, उपमेयर बसन्ती श्रेष्ठ, प्रवक्ता एवं वडाध्यक्ष कृष्णप्रसाद खड्गी लगायतले पुरस्कार वितरण गरेको आयोजक क्लबका अध्यक्ष रामनारायण घिमिरेले जानकारी दिए ।

प्रतियोगिताको उत्कृष्ठ टिम उपाधि विजेता चन्द्रागिरि १५ घोषित भयो ।

त्यस्तै, व्यक्तिगत विधातर्फ उच्च गोलकर्ता सविन मर्हजन, उत्कृष्ठ गोलरक्षक प्रकट रिजाल चुनिए ।

पुरस्कार वितरण समारोहमा बोल्दै नगरप्रमुख घनश्याम गिरीले नगरपालिकाले खेल क्षेत्रको विकासमा नगरपालिकाले प्राथमिकता दिँदै आएको बताउँदै आगामी दिनमा युवापुस्ताले नै खेलकुदमार्फत नगरपालिका र सिङ्गो राष्ट्रलाई नै चिनाउने विश्वास लिएको बताए ।