थानकोट ।

चन्द्रागिरि नगरपालिका नैकापमा जारी पाँचाैं संस्करणको नैकाप गोल्डकपको फाइनलमा डिफेन्डिङ च्याम्पियन र रनर अप पुनः आमुने सामुने हुने भएका छन् ।

बुधबार सम्पन्न प्रतियोगिताको दोश्रो सेमिफाइनल खेलमा स्थानीय गोल्डस्टार युवा क्लबमाथि २-१ को संघर्षपूर्ण जित निकाल्दै साबिक उपविजेता ब्लुबेल एफसीले गत सिजनको च्याम्पियन तारकेश्वरसँगको भेट पक्का गरेको हो ।

प्रतिस्पर्धात्मक खेलमा गोल्डस्टारले युवराज खड्काको गोलमा अग्रता लियो । दोस्रो हाफमा संजोग महर्जनको गोलमा ब्लुबेल खेल बराबरीमा ल्याउन सफल भयो ।

सडेन डेथमा खेल धकिलिने अनुमानलाई गलत साबित गर्दै अतिरिक्त समयको अन्तिम मिनेटमा ब्लु बेलका लागि पुजन उपरकोटीले गोल गर्दै आफ्नो टिमलाई फाइनलमा गत सिजनको पराजयको बदला लिन तारकेश्वरसँगको भेट पक्का गरे । 

 खेलका म्यान अफ दि म्याच ब्लु बेल एफ सी का संजोग महर्जन चुनिए । 

यसअघि गणेशमान स्मृति फुटसल क्बलाई ३-१ ले पराजित गर्दै तारकेश्वर युथ क्लब लगातार दोश्रो पटक उपाधी नजिक पुगिसकेको छ । 

फाइनल खेल शनिबार हुनेछ ।