थानकोट । 

पाँचाैं नैकाप गोल्डकपको दोश्रो चरणको खेलमा आजपनि दुई खेल हुँदैछन् ।

चन्द्रागिरि नगरपालिका नैकापस्थित फुटबल मैदानमा दिउँसो २ः३० बजे समुह बी मा रहेका गणेशमान स्मृति फुटसल क्लब र कुर्दन फुटबल एकेडेमी भिड्नेछन् । यस खेलको विजेताले असोज २९ गते सेमिफाइनल प्रवेशका लागि गुणकेशरी युथ क्लबको सामना गर्नेछ । यस अघि मध्यान्ह १२ः३० बजे समुह सी मा रहेका मध्यपुर जागरूक युवा क्लब र गोल्डस्टार युवा क्लबबीच खेल हुनेछ । यस खेलको विजेताले सेमिफाइनल प्रवेशका लागि असोज २९ गते क्लिन भिजन यूनिटीसँगको भेट पक्का गर्नेछ । 

नैकाप गोल्डकप अन्तर्गत मंगलबार सम्पन्न खेलहरूमा साबिक विजेता तारकेश्वर युवा क्लब र साबिक उपविजेता ब्लु बेल एफसीले जित हात पार्दै अन्तिम ८ मा सिट सुरक्षित गरेका छन् ।

तारकेश्वरले सडेन डेथमा ब्वाइज यूनियनमाथि ५-४ जित निकालेको थियो भने ब्लु बेलले बलम्बु स्पोर्टस् क्लबमाथि १-० को कठिन जित हात पार्यो ।