थानकोट ।

राजस्व अनुसन्धान विभागले दुई साताअघि प्रहरीबाट बरामद भएको सुन तस्करी गर्न लगिँदै गरेको २५ करोड रुपियाँको मुख्य मालिक पहिचान गर्न सफल भएको छ ।

विभागका अनुसन्धान अधिकृतको दुई सातासम्मको अथक् मिहिनेत, परिश्रम र सूक्ष्म अनुसन्धानले सो रकमको मालिक सिन्धुपाल्चोक जिल्ला भोटेकोसी गाउँपालिका–४ स्थायी घर भई हाल काठमाडौं जिल्ला टोखा नगरपालिका–१० महादेवटार बस्दै आइरहेका नारायण पौडेल रहेको तथ्य औंल्याएको हो ।

विभागका महानिर्देशक चण्डीप्रसाद घिमिरेले अहिलेसम्मको अनुसन्धानले बरामद भएको २५ करोड रुपियाँको मुख्य मालिक नारायण पौडेलले नै रहेको पुष्टि भएको बताउनुभयो । पौडेलको खोजतलास जारी राखिएको जनाउँदै विभागले अदालतबाट पक्राउ पुर्जी जारी भइसकेको जनाएको छ ।

रकम बरामद भएको दिनदेखि नै फरार पौडेललाई पक्राउ गरी विभागमा दाखिला गर्न विभागले प्रहरीलाई पत्राचार गरेको छ । यसअघि पनि भारतमा बसेर विभिन्न तस्करीका कार्य गर्ने गरेकाले पौडेल हाल भारतमा लुकेर बसेको हुन सक्ने स्रोतको दाबी छ ।

महानिर्देशक घिमिरेले विभागले स्वतन्त्रपूर्वक अनुसन्धान गर्न पाएको र प्रधानमन्त्री तथा उहाँको सचिवालयबाट आवश्यक सहयोग पाएकाले २५ करोड तस्करीको मुख्य मालिकको पहिचान गर्न विभाग सफल भएको बताउनुभयो । यद्यपि पौडेलभन्दा माथि पनि तस्करीको ठूलै समूह रहेको हुन सक्ने आशंका बाँकी नै छ र पौडेलका व्यावसायिक साझेदारका बारेमा पनि विभागले केही जानकारी दिएको छैन । पौडेल पक्राउ परेपछि त्यसबारेमा पनि अनुसन्धान हुन सक्ने विभागका अधिकारीहरुले जनाएका छन् ।

यसअघि रक्तचन्दन तथा विभिन्न सुन तस्करी प्रकरण, जुवा प्रकरण र हुण्डी कारोबारमा समेत जोडिँदै आएका पौडेल माओवादी केन्द्र निकट मानिन्छन् । उनलाई माओवादी केन्द्रका केही शीर्ष नेताहरुको संरक्षण रहेको स्रोतको दाबी छ । विभागले पौडेल ठूलो कारोबार गर्ने तस्कर रहेको औंल्याउँदै उनको सम्पूर्ण सम्पत्ति र बैंक खाता रोक्का गर्न सम्बन्धित निकायमा पत्राचार गरेको छ ।

विभागले पौडेल तथा पक्राउ परेका ‘फुच्चे’ भनिने कुसाङ लामालाई विदेशी विनियमको अवैध ओसारपसार तथा अपचलनमा मुद्दा दायर गर्ने तयारी गरेको छ ।

काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले गत चैत्र ४ गते काठमाडौंको उत्तरी भेगमा पर्ने टोखा नगरपालिका–२ झोरमा २५ करोड १९ लाख २४ हजार ९ सय ५० रुपियाँ बराबरको डलर र युरो बरामद गरेको थियो । प्रहरीले ना७ख १६५२ नम्बरको ट्रकमा राखेर लैजान लागिएको सो रकम बरामद गर्नुका साथै रकम लिएर जान लागेका ट्रक चालक सिन्धुपाल्चोक भोटेकोसी गाउँपालिका–१ घर भएका ४३ वर्षीय लामालाई पक्राउ गरेको थियो । त्यसपछि प्रहरीले बरामद भएको रकम, ट्रक र चालकलाई गत चैत ५ गते नै थप अनुसन्धानका लागि राजस्व अनुसन्धान विभागको जिम्मा लगाएको थियो । त्यसपछि विभागका महानिर्देशक घिमिरेले तत्काल विभिन्न अनुसन्धान टोलीहरु बनाएर घटनाको विस्तृत अनुसन्धान थाल्नुभएको थियो ।