थानकोट ।

चैत्र शुक्ल तृतियाका दिन मनाइने मत्स्य जयन्ती आज सोमबार चन्द्रागिरि नगरपालिका-०९ मच्छेगाउँस्थित मत्स्य नारायण मन्दिरमा विशेष पूजा अर्चना गरी मनाइँदैछ । 

मत्स्य जयन्तीका अवसरमा मत्स्यनारायण मन्दिर व्यवस्थापन समितिको अग्रसरतामा आज बिहान ९ बजेबाट हवन, पाठपूजा तथा भजन कृतन आयोजना गरेको छ ।

यस दिन विष्णु सहस्त्रानाम, विष्णु पुराण लगायतका ग्रन्थहरु पाठ गर्ने र श्रोता र वक्ता सबैले चित्त लगाएर मनन गर्ने चलन छ ।

हिन्दू धर्ममा भगवान विष्णुको मत्स्य अवतारको वर्णन छ। भगवान विष्णुको यो अवतार ठूलो माछाको अवतार हो। भगवान विष्णुका २४ अवतारहरुको वर्णन गरिएको छ ।

तीमध्ये २३ अवतार पृथ्वीमा आएका छन् भने २४ औं अवतार ‘कल्की अवतार’को रूपमा आउन बाँकी छ । ती मध्ये एक मत्स्य अवतार हो। भगवान विष्णुले आफ्नो मत्स्य अवतारमा पृथ्वीलाई बाढीबाट बचाएका थिए ।

उनले हयग्रीव नामक राक्षसलाई पनि मारेका थिए । हयग्रीवले वेद चोरेर समुद्रको गहिराइमा लुकाएका थिए । यसरी भगवान विष्णुले मत्स्य अवतारमा देखा परेर वेदको रक्षा गरे। मत्स्य अवतारलाई भगवान विष्णुको पहिलो अवतार भनिन्छ।

हिन्दू शास्त्र अनुसार भगवान विष्णुले हयग्रीव नामक राक्षसबाट पृथ्वीको रक्षा गर्न विशाल मत्स्य (माछा) को अवतार ग्रहण गरेका थिए। माछाको रूप लिएर भगवानले फेरि दानवको छोराबाट वेद प्राप्त गरे।

त्यसैले यस दिन व्रत बसेर भगवान विष्णुको मत्स्य अवतारको पूजा गरिन्छ । यस दिन पवित्र नदीमा स्नान, पूजा र व्रत गर्नाले शरीर र मनको शुद्धि हुने र दुःख-कष्ट हट्ने जनविश्वास छ ।