थानकोट ।

पोखरामा जारी टाइगर कप राष्ट्रिय तथा अन्तर्राष्ट्रिय भलिबल प्रतियोगितामा महिलातर्फ नेपाल पुलिस क्लबलाई ३–० को सोझो सेटमा पराजित गर्दै न्यू डायमण्ड स्पोर्ट्स क्लब दोस्रो क्वालिफायरमा प्रवेश गरेको छ ।

न्यू डायमण्डले अब फाइनल प्रवेशका लागि सशस्त्र प्रहरी बलको एपिएफ क्लब र आयोजक टाइगर ग्रुपबीचको खेलमा पराजित हुने टोलीसँग प्रतिस्पर्धा गर्नेछ ।

न्यु डायमन्डले पहिलो सेट २५-२२, दोस्रो सेट २५-१४ र तेस्रो सेट २५-२१ ले आफ्नो पक्षमा पार्यो ।

यसअघि न्यू डायमण्डले लिग चरणमा पनि पुलिसलाई पराजित गरेको थियो ।

पुलिस ‘हार्ने समूह’ बाट शीर्ष स्थान र न्यु डायमण्ड ‘जित्ने समूह’ बाट तेस्रो स्थानमा रहँदै एलिमिनेटरमा प्रवेश गरेका थिए ।

टाइगर ग्रुप अफ पोखरा नेपालको आयोजनामा भइरहेको प्रतियोगिता यही माघ २० गतेसम्म चल्नेछ । प्रतियोगिताको च्याम्पियन टोलीले महिला तथा पुरुषतर्फ समान पाँच लाख ८५ हजार ५५५ पुरस्कार पाउनेछन् । द्वितीयले रु दुई लाख ८५ हजार ५५५ र तृतीयले एक लाख ८५ हजार ५५५ प्राप्त गर्नेछन् ।

महिला तथा पुरुषतर्फ सर्वोत्कृष्ट हुने खेलाडीले जनही २५ हजार ७७७ पाउनेछन् ।

दुवैतर्फ विधागत उत्कृष्ट ठहरिने खेलाडीलाई जनही १० हजार ५५५ पुरस्कार प्रदान गरिने प्रतियोगिताका प्रचारप्रसार संयोजक इन्द्रप्रसाद पौडेलले जानकारी दिए ।