थानकोट ।

ललितपुरकाे गोदावरी नगरपालिकाको आयोजनामा दोस्रो उपत्यकाव्यापी अन्तर नगरपालिका खुल्ला मेयर कप फुटबल प्रतियोगिता आगामी चैतमा आयोजना हुने भएको छ ।

नगरपालिकाको वडा नं. १० टाहाखेल–झ्यालुन्टारमा अवस्थित गोदावरी बहुउद्देश्यीय रंगशालाको खेल मैदानमा आगामी चैत ९ गतेदेखि चैत २३ गतेसम्म उपत्यकाभित्रका विभिन्न पालिकाका टिमले प्रतिस्पर्धा गर्ने नगरप्रमुख गजेन्द्र मर्हजनले जानकारी दिए।

स्थानीय तहकोतर्फबाट टिम दर्ताका लागि नगरपालिकाले सूचनामार्फत यही फागुन १ गतेदेखि फागुन २ गतेसम्मको समय तोकेको गोदावरी नगरपालिकाका खेलकुद संयोजक एवं वडा नम्बर १४ का वडा अध्यक्ष निरोज बज्राचार्यले बताए।

प्रतियोगिताको विजेता टिमलाई ५ लाख र उपविजेतालाई ३ लाख रुपैयाँ पुरस्कार प्रदान गर्ने उनले बताए। उनका अनुसार अनुशासित टिम तथा उत्कृष्ट गोलकिपर, डिफेण्डर, फरवार्ड, सर्वाधिक गोलकर्ता र उत्कृष्ट प्रशिक्षकलाई पनि नगद पुरस्कार दिइनेछ ।

नयाँ खेलाडी उत्पादन र फुटबलको विकास गर्ने उदेश्यले उपत्यकाव्यापी अन्तर नगरपालिका फुटबलको आयोजना गरिएको प्रमुख मर्हजनले बताए। उनले प्रतियोगिताले नवनिर्मित गोदावरीको खेल मैदान विस्तारगर्न थप बल पुग्ने विश्वास व्यक्त गरे।

दोस्रो संस्करणको मेयर कपको तयारी स्वरुप गोदावरीले आफ्नो टिम निर्माण गर्न गत मसीरमा वडाव्यापी मेयर कप फुटबल यही मैदानमा सम्पन्न गरिसकेको छ। यसअघि गत वैशाख र जेठमा सम्पन्न भएको पहिलो मेयर कपमा उपत्यकाभित्रका १४ वटा पालिकाका १५ वटा टिमले यो प्रतियोगितामा प्रतिस्पर्धा गरेका थिए ।

गोदावरीको ए र बी गरी २ टिम समावेश भएका थिए । प्रतियोगिताको उपाधि चन्द्रागिरी नगरपालिकालाई २-१ गोल अन्तरले हराउँदै काठमाडौं महानगरपालिकाले जितेको थियो।