थानकोट ।

काठमाडाैंमा जारी सभापति कप फुटबल प्रतियोगिताको सेमीफाइनलमा आज संकटा क्लब र मच्छिन्द्र क्लब आमुने सामुने हुने भएका छन् ।

नेपाली काँग्रेस लोकतान्त्रिक खेलकुद सङ्घको योजनामा राजधानीमा जारी सभापति कप फुटबल प्रतियोगितामा आज संकटा र मच्छिन्द्र आमुन्ने सामुन्ने हुन लागेका हुन् ।

त्रिपुरेश्वरस्थित दशरथ रङ्गशालामा साँझ साढे ५ बजेबाट खेल सुरू हुनेछ ।

यसअघि हिजो (आइतबार) भएको खेलमा न्यूरोड टिम (एनआरटी) विजयी भएको छ।

प्रतिद्वन्द्वी फ्रेन्ड्स क्लबलाई १ को विरुद्ध ३ गोल हान्दै एनआरटी विजयी भएको हो। यो जीत सँगै सेमिफाइनलको समिकरण पूरा भएको थियो।

एनआरटीसँगै सेमिफाइनलको लागि सङ्कटा, मच्छिन्द्र र आयोजक बागमतीले आफ्नो स्थान सुरक्षित बनाएका हुन् ।

दोश्रो सेमीफाइनलमा एनआरटीले मंगलबार आयोजक बागमतीसँग खेल्नेछ।

नेपाली काँग्रेसका सभापतिको नाममा सञ्चालित नकआउट प्रतियोगिताको विजेताले नगद २६ लाख रुपैयाँ पाउने आयोजकले जनाएको छ ।

यसैगरी उप विजेता टोलीले १३ लाखमा चित्त बुझाउने छ ।

प्रतियोगितामा प्रत्येक खेल खेल्ने टोलीले नगद ५० हजार पाइरहेका छन् भने प्लेयर अफ दी म्याचले १५ हजार पाइरहेको जनाइएको छ ।
प्रतियोगिताका हेर्नका लागि १ सय र ३ सय रुपैयाँको टिकट तोकिएको छ ।