थानकोट ।

धादिङमा बिहीबार भएको सवारी दुर्घटनामा १६  जना घाइते भएका छन् ।

गल्छी गाउँपालिका-४ बेल्खुस्थित पृथ्वीलोकमार्गमा पोखराबाट काठमाडौंका लागि छुटेको ग २ ख ६६६ नम्बरको माइक्रोबस (हाइस) र विपरीत दिशाबाट आउँदै गरेको ना ६ ख ७१८ नम्बरको ट्रक ठोक्किएर दुर्घटना भएको हो ।

प्रहरीका अनुसार दुर्घटनामा स्याङजाका २५ वर्षीया रविना शाह, नुवाकोटको विदुर नगरपालिका-१२ का २१ वर्षीय विकेक मिजार, धादिङ निलकण्ठ नगरपालिका-२ का २६ वर्षीय राज गुरूङ, कास्कीको पोखरा महानगरपालिका-१४ का २७ वर्षीया सुस्मिता आले घाइते भएका छन् ।

यसैगरी, सोही ठाउँका २२ महिनाका रिहान पुन, ३३ वर्षीय खिम राज पुन, नाम ठेगाना नखुलेका एक जना विदेशी नागरिक, धादिङको सिद्दलेख गाउँपालिका-६ का २४ वर्षीय यम बहादुर घले, तनहुँको शुक्ला गण्डकी गाउँपालिका-७ का ३८ वर्षीय सुनिता आले, गोरखाको सहिद लखन गाउँपालिका-१ का २१ वर्षीय समय अर्याल, गोरखाकै ६१ वर्षीया मधुमाया अर्याल पनि दुर्घटनामा घाइते भएको प्रहरीले जनाएको छ ।

यसैगरी, धादिङ बेनिघाट रोराङ गाउँपालिका-६ का ३९ वर्षीय रमेश थापा मगर,  नाम, थर ,वतन नखुलेको अन्दाजी २२ वर्षीय महिला एक, १८ वर्षीय महिला एक जना, म्याग्दीको बेनि नगरपालिका-४ का ३४ वर्षीय पुरन पुन  र कास्कीको पोखरा महानगरपालिकाका ३४ वर्षीय पुष्प पुन  घाइते भएका छन् ।

घाइतेमध्ये १२ जनालाई थप उपचारका लागि राष्ट्रिय ट्रमा सेन्टर काठमाडौं रेफर गरिएको छ । यी मध्ये सात जनाको अवस्था चिन्ताजनक रहेको धादिङ प्रहरीले  जनाएको छ।

तस्बिरः नवि अहमद हजारी