थानकोट ।

खोटाङबाट काठमाडौं आउँदै गरेको टाटा सुमोमाथि काभ्रेको भकुण्डेबेँसीबाट केही माथि पात्लेखेत भन्ने ठाउँमा तोडफोड भएको छ ।

साइड नदिएको निहुँमा तुवाचुङ यातायात प्रालिको बा १ ज ६१७२ नम्बरको टाटा सुमोमा तोडफोड गरिएको हो ।

असोज १० र ११ गतेको अविरल वर्षाका कारण गएको पहिरोले क्षतिग्रस्त वीपी राजमार्ग अहिले साँघुरो छ । विपरित दिशाबाट आउँदै गरेको गाडीलाई साइड नदिएको भन्दै उनीहरुले बुधबार गाडीमा चारैतिर तोडफोड गरेका थिए ।

पछि सुमोका चालकले गाडी भगाएर काभ्रे प्रहरी चौकीसम्म पुर्याएका थिए ।

गाडी तोडफोड गरेको आरोपमा अहिले काभ्रे प्रहरीले ९ जनालाई नियन्त्रणमा लिएको छ ।

जिल्ला प्रहरी कार्यालय काभ्रेकी प्रमुख एसपी बसुन्धरा खड्काका अनुसार भिडियो क्लिपका आधारमा तोडफोड गर्नेलाई पक्राउ गरेर आवश्यक अनुसन्धानका लागि धुलिखेल ल्याइएको छ ।