संविधान संशोधन २०८७ सालमा हुन्छ: प्रधानमन्त्री ओली
Thankot Times
२०८१ पुष २४ गते ८:३५
थानकोट ।
प्रधानमन्त्रीसमेत रहेका नेकपा (एमाले) का अध्यक्ष केपी शर्मा ओलीले संविधान संशोधन २०८७ सालमा हुने बताएका छन्।
पार्टी केन्द्रीय कार्यालय च्यासलमा बसेको केन्द्रीय कमिटीको मंगलबारको बैठकमा बोल्दै उनले तत्काल संविधान संशोधन नहुने बताएका हुन्।
‘अहिले राष्ट्रिय सभामा एमालेको बहुमत छैन, २०८७ सालमा एमालेको बहुमत पुग्छ अनि त्यतिबेला संविधान संशोधन गर्नेछौं,’ ओलीले भने।
प्रधानमन्त्रीसमेत रहेका अध्यक्ष ओलीले २०८७ मा संविधान संशोधन हुन्छ भन्ने अभिव्यक्ति दिएपछि केही केन्द्रीय सदस्यले उठेर २०८३ होला नि भनेका थिए।
‘अध्यक्षज्यू झुक्किनुभयो जस्तो छ, २०८३ भन्न खोज्नु भएको होला नि!,’ एक केन्द्रीय सदस्यले भनेका थिए। जबाफमा अध्यक्ष ओलीले २०८७ सालमै हो भनेका हुन्।
ट्रेन्डिङ
