थानकोट ।

नागार्जुन नगरपालिकास्थित तारकेश्वर युवा क्लबको आयोजनामा जारी स्युचाटार क्रिकेट लिग इन्डोर टी–१० प्रतियोगिताको क्वाटर फाइनल पुग्ने सबै ८ टोलीको टुंगो लागेको छ । 

मंगलबारका खेलपछि समूह ‘ए’ बाट क्रिकेट एक्सिलेन्स सेन्टर (सीईसी), समूह ‘बी’ बाट किंंग्स क्रिकेट एकेडेमी र स्टुडियो सेभेन, समूह ‘सी’ बाट टिम बीडीएस, समूह ‘डी’ बाट ग्रेट हिमालय क्रिकेट एकेडेमी र मिक्समान्डु क्वाटरफाइनल पुगेका हुन् ।

लिग कम नकआउट आधारमा सञ्चालन भइरहेको प्रतियोगिताको विजेताले १ लाख र उपविजेताले ५० हजार नगद पुरस्कार प्राप्त गर्नेछन् । यस्तै प्लेयर अफ सिरिजले १० हजार तथा उत्कृष्ट बलर र ब्याट्सम्यानले जनही ५ हजार पुरस्कार पाउनेछन् ।

प्रतियोगिता अन्तर्गत आज बुधबार लिग चरणका ६ खेल हुने तालिका रहेको छ ।