थानकोट ।

गत पाैष १० गते नेकपा एमालेले पार्टीको संगठित सदस्यबाट निष्कासनमा परेका नेता डा. भीम रावलले आज बुधबार आफ्ना भावी योजनाबारे जानकारी दिन पत्रकार सम्मेलन गर्दै छन् ।

कम्युनिस्ट र उदारवादी विचारधारा समेट्ने गरी नयाँ पार्टी गठन गर्ने तयारीमा रहेका रावलले बुधबार दिउँसो एक बजे काठमाडौंको कार्की बैन्क्वेटमा पत्रकार सम्मेलन गर्न लागेका हुन् ।

नेकपा एमालेका अध्यक्ष केपी शर्मा ओलीको कार्यशैलीको खुलेर विरोध गर्दै आएका रावलले २०७८ सालमा चितवनमा आयोजित १० औं महाधिवेशनमा ओलीविरुद्ध अध्यक्ष पदमा प्रतिस्पर्धा गरेका थिए । उनी पराजित भएपछि एमालेले सल्लाहकार कमिटीमा राखेको थियो । तर उनले त्यो जिम्मेवारी बहन गरेका थिएनन् ।

चन्द्रागिरि र कीर्तिपुर नगरको सीमा क्षेत्रनजिकै व्यवसायी मीनबहादुर गुरुङले दान दिएको जग्गामा पार्टी मुख्यालय बनाउने विषयमा सार्वजनिक मञ्चमा प्रतिक्रिया दिएपछि उनी कारबाहीमा परेका हुन् ।