थानकोट।

बामदेव गौतमले नेकपा एकीकृत समाजवादीमा प्रवेश गर्ने सम्भावना रहेको जनाएका छन् ।

सोमबार आलोकनगरस्थित नेकपा एसको केन्द्रीय कार्यालयमा पुगेका गौतमले पार्टी प्रवेशका लागि शर्तहरू राखेका बताइएको छ।

नेकपा एसका अध्यक्ष माधवकुमार नेपालसँग भेटवार्ता गरेपछि गौतमले भने, ‘पुराना कुरा स्मरण गरियो, नयाँ आकाशमा कसरी उड्ने भन्ने छलफल भयो, र पार्टीमा सँगै जाने बारेमा सकारात्मक कुरा भएको छ, हेरौं अब के हुन्छ ?’

पार्टी कार्यकारी राष्ट्रपतिको अजेन्डामा जानुपर्ने, अभिव्यक्ति स्वतन्त्रता हुनु पर्ने तथा केन्द्रीय सदस्य पूर्णकालीन हुनु पर्नेलगायतका शर्त राखेको उनले जानकारी दिए । उनका अनुसार अध्यक्ष नेपालले पार्टी भित्र छलफल गरेर खबर गर्ने आश्वासन दिएपछि बैठक सकिएको थियो ।

नेकपा एसले तेस्रो मर्यादाक्रममा राखेर गौतमलाई पार्टी भित्र प्रवेश गराउने प्रयास गरिरहेको छ, त्यसैको सिलसिलामा उनी सोमबार नेकपा एसको केन्द्रस्य कार्यालय पुगेका हुन् ।