थानकोट ।

नेपाल आँखा कार्यक्रम, ख्वप तिलगंगा आँखा अस्पतालको प्राविधिक सहयोग र काभ्रेको महाभारत गाउँपालिकाको आयोजनामा मंसिर १७ गतेदेखि २२ गतेसम्म संचालन गरिएको मोतिबिन्दु छनौट तथा शल्यक्रिया शिविर सफलताका साथ सम्पन्न भएको छ ।

गाँउपालिकाका विभिन्न वडाहरुमा मंसिर १७ गतेदेखि १९ गतेसम्म मोतिबिन्दु छनौट शिविर संचालन गरिएको थियो । शिविरबाट एक हजार तीन सय ६ जना बिरामीहरुले आवश्यक औषधिसहित प्रत्यक्ष उपचार पाएका थिए भने एक सय ३५ जना मोतिबिन्दु शल्यक्रिया गर्नुपर्ने बिरामीहरु छनौट गरिएको थियो ।

शिविरबाट छानिएका मोतिबिन्दु शल्यक्रिया गर्नुपर्ने बिरामीहरूको मंसिर २१ र २२ गते घर्तिछाप स्वास्थ्य चौकीमा शल्यक्रिया सम्पन्न भएको छ । एक सय ३५ जना मोतिबिन्दु शल्यक्रिया गर्नुपर्ने बिरामीहरु छनौट गरिएकोमा जम्मा एक सय जनाको शल्यक्रिया गरिएको शिविरका संयोजक तथा ख्वप तिलगंगा आँखा अस्पतालका इन्चार्ज धिरज अधिकारीले बताए ।

शिविर महाभारत गाउँपालिकाका सम्पूर्ण वडाहरुलाई पायक पर्ने गरी मोतिबिन्दु छनौट शिविर राखिएको थियो। शल्यक्रिया शिविरमा नेपाल आँखा कार्यक्रम, ख्वप तिलगंगा आँखा अस्पतालका वरिष्ठ नेत्र रोग विशेषज्ञ तथा आँखा अस्पताका प्रमुख सुदीप राजभण्डारीको नेतृत्वमा सम्पन्न भएको हो ।

यसअघि ख्वप तिलगंगा आँखा अस्पतालले भक्तपुर तथा आसपासका जिल्लाहरुमा एकदिने मोतिबिन्दु छनौट शिविर राखिएता पनि शल्यक्रिया सहितको शिविर पहिलो पटक महाभारत गाँउपालिकामा गरिएको इन्चार्ज अधिकारीले बताए ।

शल्यक्रिया शिविरमा १३ वर्षका बालकदेखि १०० वर्षसम्मका वृद्ववृद्वाको शल्यक्रिया गरिएको थियो ।

शिविरमा एकै घरका विगत ११ बर्षदेखि दुवै आँखाको ज्योती गुमाएका दिदी, भाइको पनि दुवै आँखाको सफल शल्यक्रिया गरिएको थियो ।