थानकोट ।

नेपाल प्रिमियर लिग (एनपिएल) मा विराटनगर किंग्सले रोमाञ्चक जित निकालेको छ।

बुधबार कीर्तिपुरस्थित त्रिवि मैदानमा अन्तिम ओभरको सुरुवाती पांँच बलमा १७ जोड्दै विराटनगरले लुम्बिनी लायन्सविरूद्ध २ विकेटको रोमाञ्चक जित निकालेको हो।

अघिल्ला दुई खेलमा पराजित भएको विराटनगरको यो पहिलो जित हो। लुम्बिनी भने आफ्नो पहिलो खेलमा पराजित भयो।

लुम्बिनीले दिएको १९२ रनको लक्ष्य  विराटनगरले आठ विकेट गुमाएर अन्तिम एक बल बाँकी छँदा पूरा गर्‍यो।

टस जितेको विराटनगरले फिल्डिङ रोजेपछि पहिले ब्याटिङ गरेको लुम्बिनीले ७ विकेटको क्षतिमा १९१ रन जोड्यो। 

लुम्बिनीका लागि कप्तान रोहित कुमार पौडेलले ४६ रन जोडे। उनले २९ बलमा ४ चौका र २ छक्का प्रहार गरे। विवेक यादवले ७ बलमा ३ छक्का प्रहार गर्दै नटआउट १९ रन जोडे।