थानकोट ।

चितवन राइनोजले नेपाल प्रिमियर लिग (एनपीएल)को पहिलो खेलमा काठमाडौं गुर्खाजविरुद्ध पाँच विकेटको जित निकालेको छ । 

सोमबार कीर्तिपुरस्थित त्रिवि क्रिकेट मैदानमा सम्पन्न खेलमा काठमाडौंले प्रस्तुत गरेको ११२ रनको सामान्य लक्ष्य चितवनले १७.१ ओभरमा पाँच विकेट गुमाएर भेट्टायो ।

चितवनको जितमा सन्तोष कार्कीले अविजित २८ रन बनाए ।

सन्तोषले ३१ बलमा समान दुई चौका र एक छक्का प्रहार गरे ।

६८-५ को कठिन स्थितिबाट सन्तोषले अनुभवी नेपाली ब्याटर शरद भेषवाकरसँग ४६ रनको साझेदारी गर्दै चितवनलाई जितसम्म डोहोर्‍याए । 

त्यसअघि चितवनका पाकिस्तानी बलर सोहेल तान्विरले घातक बलिङ गर्दा टस हारेर ब्याटिङमा आएको काठमाडौंले निर्धारित २० ओभर ब्याटिङ गरे पनि नौ विकेट गुमाएर १११ रनको सामान्य योगफलमा रोकिएको थियो ।

चितवनविरुद्ध निरीह देखिएको काठमाडौंका चार ब्याटरले मात्रै दोहोरो अंकमा रन जोडे ।

काठमाडौंका सुमित महर्जनले सर्वाधिक २९ रन बनाए । 

माइकल लेभिटले २५ रन थप्दा डान डोउथह्वाइटले १९ र शंकर रानाले १६ रन जोडे ।

यसबाहेक, अन्य ब्याटर प्रदर्शन उल्लेख्य रहन सकेन । काठमाडौंको ब्याटिङ धरासायी बनाउन चितवनबाट खेलिरहेका पूर्वपाकिस्तानी बलर तान्विरले पाँच विकेट लिए । 

प्रतियोगिता अन्तर्गत सोमबार नै जनकपुर बोल्ट्सविरुद्ध कर्णाली याक्सबीच प्रतिस्पर्धा हुनेछ ।