थानकोट ।

नेपाल क्रिकेट सङ्घ (क्यान) ले आईसीसी टी-२० विश्वकपमा छनोट भएको १९ वर्षमुनिको महिला क्रिकेट टोलीका सदस्यलाई साढे दुई लाख रुपैयाँका दरले पुरस्कारसहित सम्मान गर्ने भएको छ ।

आज बसेको क्यानको बैठकले खेलाडीलाई साढे दुई लाख र अफिसियलहरूलाई एक लाख ५० हजार रुपैयाँ दिने निर्णय गरेको क्यानका प्रवक्ता छुम्बी लामाले जानकारी दिनुभयाे ।

बुधबार भएकाे १९ वर्षमुनिको महिला टी-२० विश्वकपको एशिया छनोटको निर्णायक खेलमा यूएईलाई ८ विकेटले हराउँदै नेपाल पहिलाे पटक टी–२० विश्वकपमा छनाेट भएकाे थियाे ।

 १९ वर्षमुनिको महिला टी-२० विश्वकप क्रिकेट प्रतियोगिता अर्काे वर्ष जनवरीमा मलेसियामा आयोजना हुँदैछ ।