थानकोट ।

नेकपा एमालेले मंसिर ७ गते काठमाडौँमा आयोजना गर्ने जागर सभा भव्य र व्यवस्थित गर्न एमाले नेता डा.राजन भट्टराईको संयोजकत्वमा ११ सदस्यीय संयोजन समिति गठन गरेको छ । एमालेले मंसिर ७ गते काठमाडौँ उपत्यकाका तीन जिल्लाको संयुक्त आयोजनामा जागरण सभा गर्दैछ । 

सभाको तयारीका लागि बुधबार एमाले महासचिव शंकर पोखरेलको उपस्थितिमा उपत्यका मातहत कमिटी, जनसंगठन र विभागीय प्रमुखको संयुक्त बैठकले नेकपा एमाले बागमती प्रदेशका इन्चार्ज भट्टराईको संयोजकत्वमा संयोजन समिति गठन गरेको हो । समितिको सहसंयोजकमा एमाले बागमती प्रदेश कमिटीका अध्यक्ष कैलाश ढुंगेल रहेका छन् भने सदस्यहरुमा टुका हमाल, प्रेमकुमार पराजुली, श्यामकुमार बस्नेत, दीपक निरौला, वचन देउजा, पुरुषोत्तम आचार्य, क्षितिज थेवे, समिक बडाल र जनक चौधरी रहेका छन् । 

जागरण सभा संयोजन समितिको बुधबारै बसेको पहिलो बैठकले सभालाई प्रभावकारी बनाउन जनपरिचालन, जनसभा र जनप्रदर्शन समेतको व्यवस्था मिलाएको संयोजक भट्टराईले जानकारी दिए । 

‘मुलुकमा बढ्दो अराजकता, अस्थिरताका विरुद्ध लोकतन्त्र, शान्ति, राष्ट्रिय एकता, सामाजिक सद्भाव, सुशासन, समृद्धि र विकासका लागि विधिको शासन र कानुनी राजका पक्षमा जनमत निर्माण गर्ने उद्देश्यका साथ गर्न लागिएको जागरण सभाले पार्टीको दृष्टिकोण, धारणा आम जनतामा पुर्‍याउने लक्ष्य लिएको छ’, संयोजक भट्टराईले बैठकपछि जारी गरेको विज्ञप्तिमा उल्लेख छ ।