मनकामना केबलकार आजबाट ३ दिनसम्म बन्द रहने
थानकोट ।
नेपालकै पहिलो केबलकार मनकामना केबलकार आज (असोज २९ गते)बाट कार्तिक १ गतेसम्म बन्द रहने भएको छ ।
गत बुधबार एक सूचना जारी गर्दै मनकामना दर्शन प्रालिले आजबाट तीन दिन मनकामना केबलकार सेवा बन्द रहने जनाएको हो ।
केबलकारको मुख्य लठ्ठा छोट्याउन तथा स्पाल्सिङ कार्य पूरा गर्न सेवा बन्द गर्न लागिएको हो ।
केबलकार कात्तिक २ गतेबाट नियमित सञ्चालनमा आउनेछ ।
यसअघि विजया दशमीको दिन असोज २६ गते र एकादशीको दिन २७ गते दुई दिन पनि केबलकार बन्द थियो ।
हिजो एक दिन भने केबलकार सञ्चालन गरिएको थियो ।