थानकोट।

जारी तेस्रो संस्करणको मातातिर्थ गोल्डकप फुटबल प्रतियोगितामा आज बुधबार दुई खेल हुँदैछन् ।

चन्द्रागिरि नगरपालिका-०६ मातातिर्थ बालागाउँस्थित खेल मैदानमा जारी प्रतियोगिता अन्तर्गत आज दिनको पहिलो खेलमा समतामुलक युवा क्लब र सिद्धीकाली युवा क्लब बिहान ११ बजे प्रतिस्पर्धा गर्नेछन् । यो खेलको विजेताले अन्तिम चारको टिकट काट्ने छ ।

दिनको दोश्रो तथा अन्तिम खेलमा दिउँसो २ बजे दि हिलिङ होम फुटबल क्लब र मिलन युथ क्लबबीच प्रतिस्पर्धा हुनेछ ।

दि हिलिङ होम फुटबल क्लब र मिलन युथ क्लबबीचको खेलको विजेता सेमीफाइनलमा पुग्नेछ, यो खेलको विजेताले एभरेष्ट क्लबसँग असोज १८ गते सेमीफाइनल खेल खेल्ने तालिका रहेको छ।

यसअघि मंगलबार एक मात्र खेलमा एभरेष्ट युथ क्लबले वीआर ब्रदर्शविरूद्ध १-० को संघर्षपूर्ण जित हात पारेको छ।

जितसँगै एभरेष्टले सेमीफाइनलमा स्थान सुरक्षित गरेको छ ।

प्रतियोगिताको विजेताले नगद ४ लाख रूपैयाँ, ट्रफी, मेडल र प्रमाणपत्र पाउनेछ ।

दोश्रो हुने टोलीले २ लाख ५० हजार रूपैयाँ ट्रफी, मेडल र प्रमाणपत्र पाउनेछ । यस्तै तेस्रो स्थान प्राप्त गर्ने टोलीले १ लाख ५० हजार रूपैयाँ, ट्रफी, मेडल र प्रमाण पत्र प्राप्त गर्दा उत्कृष्ठ टोलीले २० हजार प्रोत्साहन रकम पाउनेछ ।

व्यक्तिगत विधातर्फ सर्वोत्कृष्ठ खेलाडी, सर्वाधिक गोल कर्ता, उत्कृष्ठ डिफेन्डर र उत्कृष्ठ गोल रक्षकले नगद १० हजार रूपैयाँ, ट्रफी, मेडल प्राप्त गर्नेछन् ।

सेमीफाइनल खेल असोज १८ गते खेलाइने छ भने तेस्रो स्थान र फाइनल खेल असोज १९ गतेका लागि तय भएको बताइएको छ ।

मातातिर्थ संरक्षण तथा विकास संस्थाको आयोजनामा प्रतियोगिता सञ्चालन भएको हो ।