थानकोट ।

काठमाडौँ महानगरपालिकाका उपप्रमुख सुनिता डंगोल संयुक्त राष्ट्र संघको ७९ औ महासभामा भाग लिन बुधबार अमेरिका प्रस्थान गरेकी छन् ।

उनलाई महानगरपालिकाका प्रमुख प्रशासकीय अधिकृत प्रदीप परियारले त्रिभुवन अन्तर्राष्ट्रिय विमानस्थलको विशिष्ट कक्षबाट बिदाइ गरे । बिदाइका लागि प्रशासन विभागका प्रमुख नमराज ढकाल, सभा गृहका प्रमुख सुदर्शन भट्टराई, सचिवालय प्रमुख सौरभ गौत्तमसहित अधिकारीहरु विमानस्थल पुगेका थिए ।

उनीसँगै परशुराम नगरपालिकाका प्रमुख भरत जोशी र युवा नेता अब्दुस मियाँ पनि महासभाका लागि प्रस्थान गरेका छन् । भाद्र २७ गते महासभाको औपचारिक उद्घाटन भइसकेको छ । ‘कसैलाई पनि पछाडि नछाडौँ, वर्तमान र भावी पुस्ताका लागि शान्ति, दिगो विकास र मानव निष्ठा सुनिश्चित गर्न सहकार्य गरौँ’ भन्ने नाराका साथ महासभा सुरु भएको हो ।

उपप्रमुख डंगोल महासभा बैठकअन्तर्गतको समिट अफ द फ्युचरमा सहभागी हुने कार्यक्रम छ ।

नेपालको प्रतिनिधित्व गर्दै प्रधानमन्त्री केपी शर्मा ओली शुक्रबार त्यसतर्फ प्रस्थान गर्दैछन् ।