थानकोट ।

नारायणगढ-मुग्लिन सडकखण्डमा बस र ट्रक आइतबार बिहान ठक्कर खाँदा तीनजना घाइते भएका छन् ।

भरतपुर महानगरपालिका-२९ सिमलतालमा एआर १ टी ६३७२ नम्बरको भारतीय बसले ग २ ख ११०८ नम्बरको ट्रकलाई ठक्कर दिँदा तीनजना घाइते भएका हुन् ।

मुग्लिनबाट नारायणगढ आउँदै गरेको ट्रक र विपरीत दिशाबाट जाँदै गरेको बस ठक्कर खाएको हो ।

ट्रकमा सवार तीनजना घाइते भएको जिल्ला प्रहरी कार्यालय चितवनका प्रहरी नायब उपरीक्षक भेषराज रिजालले जानकारी दिए । घाइते सबैको अवस्था मध्यम छ ।

उनका अनुसार बसका चालक फरार रहेको र खोजी जारी रहेको छ ।

यसैगरी भरतपुर महानगरपालिका-२९ जुगेडीमा मुग्लिनबाट नारायणगढतर्फ जाँदै गरेको बा ११ च ८२६२ नम्बरको सफारीले रोकिराखेको बागमती प्रदेश०३-००१ च १७७० नम्बरको जिप र ग २ च ४४३६ नम्बरको जिपलाई ठक्कर दिएको हो ।

ठक्करबाट तीनवटै सवारीसाधनमा क्षति पुगेको छ ।