थानकोट ।

नेपाल विद्युत प्राधिकरणले भोलि (शनिबार) चन्द्रागिरि नगरका विभिन्न स्थानमा विद्युत सेवा अवरुद्ध हुने जनाएको छ ।

प्राधिकरणको बलम्बु उप-वितरण केन्द्रका अनुसार थानकोट फिडरअन्तर्गत सतुङ्गलमा विद्युतीय खम्बा सार्ने तथा लत्रिएको तार व्यवस्थापनका लागि बिहान ७ बजेबाट मध्यान्ह १२ बजेसम्म विद्युत सेवा बन्द गर्नुपर्नेछ ।

यसैगरी गुर्जुधारा क्षेत्रमा लगत खारेजी भएका हाइटेन्सन लाइनहरूको टीओडी मिटरको यूनिट रद्द गर्ने कार्यका लागि बिहान ७ बजेबाट विद्युत सेवा बन्द गर्नुपर्ने प्राधिकरणको बुलेटिनमा उल्लेख छ ।

सो कार्यका लागि विद्युत सेवा बन्द गरिँदा चन्द्रागिरि नगर क्षेत्रको बलम्बु विद्युत कार्यालय, गुर्जुधारा, दाउरा डिपो, राधाकृष्ण टोल, हाइभिजन कोलोनी, पशु विकास कार्यालय बलम्बु, सृजना चोक, खहरे बसपार्क, दम्बु, इन्द्रस्थान, श्रीकृष्ण मावि क्षेत्र, घारी गाउँ तथा मुखिया गाउँ क्षेत्रमा विद्युत अवरुद्ध हुनेछ ।

कार्य निर्धारित समय अगावै सम्पन्न भएमा सो समय भन्दा अगावै लाइन सुचारु हुन सक्ने समेत प्राधिकरणले जनाएको छ ।