थानकोट ।

चन्द्रागिरि नगरपालिका-११ सतुङ्गलस्थित जेसिस इन्टरनेशनल स्कुलमा आज शनिबार चर्चित सांगितिक समुह कुटुम्बले प्रत्यक्ष प्रस्तुति दिने भएको छ ।

अपरान्ह ३ बजेबाट सुरु हुने साे कार्यक्रमलाई हार्मोनी फर ह्युमेनिटी नाम दिइएको छ।

कार्यक्रममा नेपाल आइडलका प्रतिस्पर्धी अमित बराल तथा जेसीस स्कुल ब्याण्डले समेत प्रस्तुति दिने जेसिस स्कुलका प्रधानाध्यापक सरोज महर्जनले जानकारी दिनुभयो ।

यूनी क्याम्पस ग्लोबल, चन्द्रागिरिको आयोजनामा हुन लागेको सो कार्यक्रममा माध्यमिक शिक्षा परीक्षा दिएका तथा कक्षा १२ को परीक्षा दिएर बसेका परीक्षार्थीहरूका लागि निःशुल्क प्रवेशको अवसर दिइने आयोजकको भनाइ छ ।

यद्यपी उनीहरूले सो सुविधाका लागि प्रवेश पत्रको सक्कल वा विद्यार्थी परिचयपत्र प्रस्तुत गर्नुपर्नेछ ।

कार्यक्रममा संकलन भएको रकम जाजरकोटका भूकम्प पीडित विद्यार्थीहरूको शैक्षिक उन्नयनका लागि खर्च गरिने आयोजकको भनाइ छ ।