थानकोट । 

संघीय राजधानी काठमाडौँदेखि विश्वको सर्वोच्च शिखर सगरमाथाको चुचुरोसम्म पैदल यात्रा गरेका आरोही राजेश लामाले सो यात्राका बारेमा स्कुले विद्यार्थीहरूसँग अनुभव आदान प्रदान गरेका छन् ।

गत बिहीबार चन्द्रागिरि नगरपालिकास्थित एक विद्यालयका विद्यार्थीहरू माझ उनले कक्षा कोठामै पुगेर सो अनुभव बाँढेका हुन् ।

काठमाडाैंबाट हिँडेको ५७औँ दिनमा लामाले सगरमाथा आरोहण गरेका थिए ।

गत अप्रिल १ तारिखका दिन काठमाडौँदेखि पैदलयात्रा सुरु गरेका उनले चार सय ३२ दशमलव ६ किलोमिटर दुरीको यात्रासँगै सगरमाथाको सफलतापूर्वक आरोहण गरेका थिए । 

चन्द्रागिरि नगरपालिका-०५ स्थित रिब्स माविका विद्यार्थीहरूमाझ सर्वोच्च शिखर आरोहणका अनुभव सुनाउँदै लामाले दृढ सङ्कल्प र साहसिक मनोभावका कारण यात्रा सम्भव भएको बताए ।

इच्छा शक्ति, धैर्यता र अठोट भए जीवनमा महत्वपूर्ण उपलब्धि हासिल गर्नसक्छ भन्ने उदाहरण काठमाडौँदेखि सगरमाथा शिखरसम्मको यात्रा भएको उनले उल्लेख गरे । आगामी दिनमा नेपालको साहसिक गतिविधिमा सक्रिय हुने उनको भनाइ छ ।