थानकोट ।

काठमाडाैंमा जारी प्रधानमन्त्री कप-एनभिए महिला तथा पुरुष भलिबल लिग अन्तर्गत महिलातर्फ चन्द्रागिरि न्यु डायमण्डले लगातार दोश्रो हार व्यहोरेको छ ।

आइतबार त्रिपुरेश्वरस्थित राखेप कभर्ड हलमा भएको खेलमा नेपाल पुलिस क्लबले चन्द्रागिरि नगरपालिका न्यू डायमण्ड महिला टिमलाई ३–१ ले हराएको हो । पुलिसले १९–२५,२५–२२,२५–२२,२९–२७ ले खेल आफ्नो पक्षमा पारेको हो ।

न्यु डायमण्ड यसअघि शनिबार सम्पन्न पहिलो खेलमा सशस्त्र प्रहरीको टिमसँग ३-२ को सेटमा पराजित भएको थियो ।

त्यस्तै आइतबार नै भएको महिलातर्फको अर्को खेलमा एभरेष्ट भलिबल क्लबले विजयी सुरुवात गर्‍यो । एभरेष्टले कर्णाली प्रदेशलाई २५–१६,२५–८,२५–१० को सेटमा पराजित गरेको हो ।

लिगको महिला तथा पुरुष दुवैतर्फको विजेताले ८ लाख, दोस्रोले ४ लाख र तेस्रो हुने टोलीले २ लाख रुपैयाँ प्राप्त गर्नेछ ।