थानकोट ।

चन्द्रागिरि नगरपालिका वडा नं- ८ मातातीर्थ र चन्द्रागिरि नगरपालिका वडा नं-१५ तीनथाना प्रथम चन्द्रागिरि अन्तर वडा कप फुटबल प्रतियोगिताको सेमीफाइनलमा प्रवेश गरेका छन् । 

मंगलबार सम्पन्न प्रतियोगिता अन्तर्गतको क्वाटरफाइनल खेलमा विजयी हुँदै दुवै टिम सेमीफाइनलमा स्थान बनाउन सफल भएका हुन् । चन्द्रागिरि नगरपालिका-३ थानकोटको चुनाैती ३-१ ले पन्छाउँदै मातातीर्थले सेमीफाइनलमा स्थान पक्का गरेको हो । फाइनल प्रवेशका लागि मातातीर्थले बुधबार हुने चन्द्रागिरि-४ थानकोट र चन्द्रागिरि-१३ पुरानो नैकापबीचको विजेतासँग मंसिर १४ गते प्रतिस्पर्धा गर्नेछ ।

यसैगरी मंगलबार नै सम्पन्न प्रतियोगिताको दोश्रो क्वाटरफाइनल खेलमा चन्द्रागिरि नगरपालिका-५ महादेवस्थान किसिपिडी माथि ३-० को सहज जित हात पार्दै चन्द्रागिरि नगरपालिका वडा नं-१५ तीनथानाले पनि अन्तिम चारमा स्थान सुरक्षित गर्यो । 

फाइनल प्रवेशका लागि तीनथानाले बुधबार हुने चन्द्रागिरि नगरपालिका-९ मच्छेगाउँ र चन्द्रागिरि नगरपालिका-१० सतुगंलबीचको विजेतासँग मंसिर १४ गते प्रतिस्पर्धा गर्नेछ । 

चन्द्रागिरि अन्तर वडा कप फुटबल प्रतियोगिता समितिको आयोजनामा चन्द्रागिरि नगरपालिका नैकापस्थित फुटबल मैदानमा भइरहेको प्रतियोगिताको फाइनल खेल मंसिर १६ गते हुने तालिका रहेको छ ।