थानकोट ।

चन्द्रागिरि नगरमा जारी छैठाैं संस्करणको नैकाप गोल्डकप फुटबल प्रतियोगिता अन्तर्गत सोमबार सम्पन्न खेलहरूमा क्रमश भीमसेन युवा क्लब र मध्यपुर जागरुक युवा क्लब विजयी भएका छन् ।

दिनको पहिलो खेलमा भीमसेन युवा क्लबले किटिनी भञ्ज्याङ क्लबमाथि ३-० को सहज जित दर्ता गर्दा दोश्रो खेलमा पहिलो पटक प्रतियोगितामा सहभागी भएको त्रिभुवन आर्मी क्लबलाई मध्यपुर जागरुक युवा क्लबले १-० ले स्तब्ध बनायो ।

भीमसेन युवा क्लबले खेलको पहिलो हाफमा २ तथा दोश्रो हाफमा थप १ गोल गरेको थियो । भीमसेनका लागि अनिल बलामी, आशिष सुब्बा र अमर लामाले समान १-१ गोल गरे ।

यसैगरी सुमन डंगोलले गरेको १ गोल नै निर्णायक हुँदा त्रिभुवन आर्मी क्लब मध्यपुर जागरुक युवा क्लबसँग १-० गोलले पराजित भयो ।

जितसँगै भीमसेन युवा क्लब र मध्यपुर जागरुक युवा क्लब अघिल्लो चरणमा प्रवेश गरेका छन् ।

२७ टोलीको सहभागिता रहेको प्रतियोगिता अन्तर्गतमा मंगलबार मनकामना फुटबल क्लब र गणेशमान स्मृति फुटबल क्लब तथा नेपालय कलेज र वीजयपुर युवा क्लबबीच खेल हुनेछ ।