थानकोट ।
काठमाडौंकाे पश्चिम क्षेत्रका परिचित समाजसेवी स्वर्गीय सूर्यनारायण मानन्धरकाे प्रतिमा अनावरण गरिएको छ ।
वरिष्ठ कलाकार मदनकृष्ण श्रेष्ठकाे उपस्थितिमा बुधबार बिहान आयोजित एक कार्यक्रमका बीच मानन्धरको अर्धकदकाे शालिक अनावरण गरिएको हाे ।
महादेवस्थान-मातातीर्थ खानेपानी तथा सरसफाई उपभोक्ता समितिका तत्कालीन अध्यक्ष समेत रहेका मानन्धरको काेभिड संक्रमणका कारण २०७८ जेठ १० गते निधन भएकाे थियाे ।

शालिक अनावरण कार्यक्रममा बागमती प्रदेश सभा सदस्य रमा आलेमगर, विन्दु श्रेष्ठ, नगरका विभिन्न वडाका जनप्रतिनिधि, सुप्रसिद्ध धावक बैकुण्ठ मानन्धर लगायत स्थानीयबासीहरुकाे सहभागीता रहेकाे थियाे ।

साे क्रममा वक्ताहरूले स्वर्गीय मानन्धरले यस क्षेत्रमा पुर्याउनुभएको योगदानको स्मरण गरेका थिए ।
मानन्धर २०४३-४४ सालमा २७ वर्षको उमेरमा तत्कालीन महादेवस्थान गाउँ पञ्चायतका प्रधानपञ्च निर्वाचित भएका थिए । समाजसेवामा सक्रिय मानन्धर सहकारी अभियानमा समेत परिचित थिए ।

महादेवस्थान बासीहरुमा खानेपानी व्यवस्थापनमा पुर्याएकाे याेगदानकाे कदर गर्दै कार्यालय परिसरमा तत्कालीन अध्यक्ष मानन्धरकाे प्रतिमा स्थापना गरिएकाे महादेवस्थान-मातातीर्थ खानेपानी तथा सरसफाई उपभोक्ता समितिले जनाएको छ ।

साे समितिले चन्द्रागिरि नगरपालिका वडा नं ५, ६ र ७ क्षेत्रमा खानेपानी सेवा वितरण गर्दै आएकाे छ।