थानकोट ।

नेपाल साँस्कृतिक कला मन्दिरको आयोजनामा शुक्रबारबाट चन्द्रागिरि नगरपालिका ९ मच्छेगाउँमा २ दिने लाखे प्रदर्शनी सुरु भएको छ ।  देशभरबाट सहभागी भएका ५६ वटा समुहले सो प्रदर्शनीमा लाखे नाच देखाउने बताइएको छ। 

पहिलो दिन १८ वटा समुहले लाखे नाच देखाएका छन् । 

प्रदर्शनीको संघीय सांसद् राजेन्द्रकुमार केसी शुक्रबार दिउँसो उद्घाटन गरेका थिए । सो क्रममा चन्द्रागिरि नगरका मेयर घनश्याम गिरी, कीर्तिपुर नगरका उपमेयर शुभलक्ष्मी शाक्य,चन्द्रागिरि नगरका विभिन्न वडाका वडाध्यक्ष, विभिन्न राजनीतिक दलका क्षेत्रीय तथा स्थानीय नेताहरू लगायतको समेत उपस्थिति रहेको थियो । 

‘आफ्नो ठाउँको माैलिक कला र संस्कृति साटासाट गराैं’ नाराका साथ यसपटक आयोजना भएको लाखे नाच प्रदर्शनी कार्यक्रमको दोश्रो दिन भोलि शनिबार नायक भुवन केसी, सविन श्रेष्ठ, गायक कृष्ण विक तथा नेपाल चलचित्र प्राविधिक संघका अध्यक्ष पुष्कर लामा लगायतलाई सम्मान गरिने तालिका रहेको कार्यक्रम संयोजक निकेश शाहीले जानकारी दिनुभयो ।

आधुनिक संस्कार र संस्कृतिमा रमाइरहेका युवा जमातलाई आफ्नो मौलिक कला संस्कृति र पहिचानको बारेमा अवगत गराई उनीहरुलाई प्रत्यक्ष अनुभव गराउनु नै प्रदर्शनीको मुख्य उद्धेश्य रहेको आयोजक नेपाल साँस्कृतिक कला मन्दिरका अध्यक्ष रमेश शाहीले बताउनुभयो ।

गत वर्ष विभिन्न जिल्लाका ४२ समुहले लाखे नाच प्रदर्शनीमा सहभागिता जनाएका थिए ।