थानकोट ।

राष्ट्रिय सेवा दल (एनसीसी) जुनियर डिभिजन, २०८० ब्याज र एनसीसी सिनियर डिभिजन एल्मुनाइका विद्यार्थीहरूले चन्द्रागिरि नगरपालिका-१५ तीनथानास्थित विष्णुदेवी मन्दिर परिसर सरसफाई गरेका छन् ।

मन्दिरको सरसफाईले अरूलाई पनि सामाजिक कार्यमा सक्रिय हुन प्रेरणा दिएको विष्णुदेवी मन्दिर संरक्षण समाजका अध्यक्ष गौरीप्रसाद दवाडीले बताए ।

युवाहरूमा जिम्मेवार नागरिक बनाउनका लागि चरित्र, साहस, अनुशासन, नेतृत्व विकास र निस्वार्थ सेवाको आदर्श भावनाको विकास गराउने उद्देश्यका साथ एनसीसी कार्यक्रम सञ्चालन गरिएको महानिर्देशक उपरथी कार्कीले जानकारी दिए ।

एनसीसीले विद्यार्थी लक्षित, परिवेश सुहाउँदो योजनाहरू अघि सार्दै आएको छ । एनसीसीले गत महिना देशव्यापी रूपमा वृक्षारोपण अभियान सफलता पूर्वक सम्पन्न भएको उपरथी कार्की बताउँछन् ।

सामाजिक उत्तरदायित्व अन्तरगत गरिएको सरसफाई कार्यक्रममा नेपाली सेनाका अधिकृतहरू तथा एलआरआई स्कुलका शिक्षकहरूको समेत सहभागितामा रहेको थियो । एलआरआई स्कुल एनसीसीले विभिन्न सामाजिक कार्य गर्दै आएको स्कुलले जनाएको छ ।

युवा पुस्तामा सामाजिक चेतनाको भावना अभिवृद्धि गर्न गुणस्तरीय शिक्षा प्रदान गर्ने लगायत अतिरिक्त क्रियाकलापमा जोड दिँदै आएको एलआरआई स्कुलका समन्वय शिक्षक कौशल पन्तले जानकारी दिए ।