थानकोट ।
नेपालमा पहिलोपटक पुस्तकालय स्थापना भएको दिन पारेर हरेक साल भदाै १५ गते मनाइने पुस्तकालय दिवस शुक्रबार चन्द्रागिरि नगरमा पनि मनाइएको छ ।
चन्द्रागिरि नगरपालिका १५ तीनथानास्थित उज्यालो सामुदायिक सिकाइ केन्द्रले स्थानीय मुनाल क्लबमा पुस्तकालय दिवस मनाएको हो ।

कार्यक्रममा साहित्यकार, समाजसेवी, जनप्रतिनिधि, सिकाइ केन्द्रका प्रशिक्षार्थी तथा विद्यालयका छात्र छात्राहरूको उपस्थिति रहेको थियो ।

कार्यक्रममा प्राध्यापक घनश्याम भण्डारी, चन्द्रागिरि नगरपालिका वडा नं. १५ तीनथानाका वडाध्यक्ष घनश्याम लुँइटेल, चन्द्रागिरि साहित्य सरोवरका संयोजक गोपीचन्द्र कार्की, उज्यालो सामुदायिक सिकाइ केन्द्रका अध्यक्ष मुरारि महत लगायतको उपस्थिति रहेको थियो ।

कार्यक्रममा बोल्दै वक्ताहरूले स्थानीय स्तरका गौरव, चेतना, पुस्तकालय र अध्ययन संस्कृतिलाई निरन्तरता प्रदान गर्नु नै मानवीय दायित्व हो भन्ने विषयमा प्रकाश पारेका थिए ।
सो क्रममा साहित्यिक गतिविधिहरूमा उत्कृष्ट भएका छात्र छात्राहरूलाई प्रोत्साहन पुरस्कार प्रदान गरिएको बताइएको छ।