थानकोट । 

तीन वर्षमा एक पटक महिना दिनसम्म मनाइने मत्स्यनारायण मेला भर्न चन्द्रागिरि नगरपालिका ०९ मच्छेगाउँस्थित मत्स्यनारायण मन्दिरमा  आउने श्रद्धालुहरूको संख्या दिनहुँ बढिरहेको छ । 

मेलाको साताैं दिन सोमबारपनि बिहानैदेखी मत्स्यनारायण मन्दिर क्षेत्रमा श्रद्धालुहरूको भीड देखिन्थ्यो । 

यसैबीच मत्स्यनारायण मेला भर्न आउने श्रद्धालुहरूसँग सार्वजनिक यातायात सेवा प्रदायकहरूले बढी भाडा लिएको गुनासो आएपछि मेला व्यवस्थापन समितिले स्थलगत अनुगमन सुरू गरेको छ । 

मत्स्यनारायण क्षेत्रमा चलनचल्तीमा २ वटा रूटमा सार्वजनिक यातायात सञ्चालनमा छन् । जसमा बाघभैरव कीर्तिपुर यातायात सेवा प्रालिले रत्नपार्क-कीर्तिपुर-भत्केपाटी हुँदै मत्स्यनारायण मन्दिर नजिकसम्म यातायात सञ्चालन गर्दछ भने मत्स्य राजधानी यातायात सेवाले मच्छेगाउँ-सतुगंल-रत्नपार्क रूटमा यातायात सञ्चालन गर्दै आएको छ । 

यात्रुसँग बढी भाडा लिएको गुनासो प्राप्त भएपछि अनुगमनमा निस्किएको मेला व्यवस्थापन समितिका सदस्यहरूले सोमबार यात्रुबसका चालक तथा सहचालकहरूलाई भाडा दरका विषयमा सचेत गराएका छन् ।

मेला भर्न आउने श्रद्धालुहरूसँग कुनै सार्वजनिक यातायात सेवा प्रदायकले तोकिएको दररेटभन्दा बढी भाडा लिएको अवस्थामा तुरून्त नजिकको मेला व्यवस्थापन समितिको सचिवालयमा वा प्रहरी इकाई वा १०० नम्बरमा फोन गर्न चन्द्रागिरि नगरपालिका ०९ मच्छेगाउँका वडाध्यक्ष एवं पुरूषोत्तममास मेला व्यवस्थापन समिति संयोजक अच्यूत अधिकारीले सबैमा अनुरोध गर्नुभएको छ । 

तीन वर्षअघि कोरोना भाइरस महामारीका कारण यहाँ मेला लागेको थिएन् । यसपटक करिब २० लाख भक्तजनले मत्स्यनारायण मेला भर्ने अपेक्षा गरिएको पुरूषोत्तममास मेला व्यवस्थापन समितिले जनाएको छ। 

पुरुषोत्तम माससमेत भनिने अधिकमास परेका बेला मत्स्यनारायणमा स्नान गरी मालपुवा दान गरेमा भगवान् नारायण खुसी हुने धार्मिक विश्वास छ। 

भगवान् विष्णुका दश अवतारमध्ये पहिलो मत्स्य अवतार यहीँको कुण्डमा भएको विभिन्न धार्मिक ग्रन्थ उल्लेख गरिएको छ । मत्स्यनारायणका रूपमा भगवान विष्णुले पहिलो अवतार लिएको स्थानको रुपमा अधिकमासको समयमा मन्दिरमा पूजा आराधना गर्न मिल्ने धार्मिक विश्वास छ । मलमास अवधिमा अन्य मन्दिरहरूमा पूजापाठ नचल्ने बताइन्छ । 

सुरू भयो महिना दिन लामो मत्स्यनारायण मेला, मालपुवा दान गरेमा भगवान नारायण खुसी हुने विश्वास