थानकोट ।

चन्द्रागिरि नगर क्षेत्रमा रहेका सामुदायिक तथा संस्थागत विद्यालयका प्रधानाध्यापहरू तथा सतुगंलमा रहेको काठमाडाैं शिक्षा क्याम्पसका प्रमुखबीच विभिन्न विषयमा छलफल भएको छ । 

शनिबार क्याम्पसमा आयोजित बैठकमा चन्द्रागिरि नगरको शैक्षिक क्षेत्रको विकास र विस्तार कसरी गर्ने भन्ने सन्दर्भमा छलफल भएको बताइएको छ । 

सो क्रममा नगरका विभिन्न विद्यालयका प्रधानाध्यापकहरूले काठमाडाैं शिक्षा क्याम्पसले गुणस्तर सुनिश्चतता तथा प्रत्यायन (क्यूएए) प्राप्तिका लागि चाहिने गतिविधिमा सहकार्य गर्न प्रतिबद्धता जनाएको क्याम्पस प्रमुख शत्रुध्न प्रसाद गुप्ताले जानकारी दिनुभयो ।

बैठकमा क्याम्पस प्रमुख गुप्ताले नगर क्षेत्रका विद्यालयबाट विभिन्न तह उत्तीर्ण गरेका विद्यार्थीहरूका लागि उच्च शिक्षाकाे अध्ययनमा क्याम्पसले छात्रवृत्ति उपलब्ध गराउने विषयमा समेत प्रतिबद्धता जनाउनुभएको थियो ।

बैठकले नगरपालिकासँग समन्वय गरी नगर शिक्षा नीतिको पुनरावलोकनका लागि अनुरोध गर्ने, नगर क्षेत्रबाट माध्यमिक शिक्षा परीक्षा उत्तीर्ण गरेका विद्यार्थीहरूलाई नगर क्षेत्रमै कक्षा ११ र १२ पढ्ने अभियान अगाडी बढाउने विषयमा समेत ऐक्यबद्धता जनाएको बताइएको छ। 

सो क्रममा काठमाडाैं शिक्षा क्याम्पसले नगर क्षेत्रभित्रका विद्यालयहरूलाई उपलब्ध गराउने नगद छात्रवृत्ति समबन्धी सम्झाैता पत्रमा हस्ताक्षर गर्न सहमति गरिएको र आगामी आ.व.मा सो क्याम्पसले नगर क्षेत्रका १० विद्यालयसँग सो सम्झाैता गर्ने विषयमा निष्कर्षमा पुगिएको बताइएको छ ।