थानकोट ।

चन्द्रागिरि नगरपालिका-१० सतुगंल बोसिगाउँस्थित बोसिगाउँ खानेपानी तथा सरसफाई उपभोक्ता समितिको संरचना निर्माणका लागि चन्द्रागिरि नगरपालिका-९ मच्छेगाउँ निवासी हिरामाया श्रेष्ठले व्यक्तिगत जग्गा दान गर्नुभएको छ ।

सो जग्गा दिवंगत पिता हिराबहादुर श्रेष्ठको स्मृतिमा खानेपानी उपभोक्ता समितिलाई २०७४ सालमा उपलब्ध गराइएको जग्गादाता अजय श्रेष्ठले बताउनुभयो ।

करिब ५ सय घरमा खानेपानी वितरण गरिरहेको सो समितिको सोमबार बोसिगाउँमा आयोजित प्रथम साधारणभाका अवसरमा जग्गादाता श्रेष्ठका छोरा अजय श्रेष्ठलाई सांसद् राजेन्द्रकुमार केसीले सम्मान गर्नुभएको छ । स्थानीय खुसीखुसी चोकमा रहेको करिब १ आना क्षेत्रफलको सो जग्गा खानेपानी उपभोक्ता समितिको डिपबोरिङ तथा फिल्टर प्लान्ट राख्नका लागि श्रेष्ठ परिवारले खानेपानी उपभोक्ता समितिलाई उपलब्ध गराएको हो ।

साधारणसभाका क्रममा खानेपानी समितिलाई सहयोग पुर्याउने अन्य दाता एवं सहयोगीहरूको पनि सम्मान गरिएको थियो । सो क्रममा प्रदेश सभा सदस्य रमा आलेमगर, चन्द्रागिरि १० का वडाध्यक्ष शीवकुमार महर्जन लगायतको उपस्थिति रहेको समितिका अध्यक्ष दान बहादुर महर्जनले जानकारी दिनुभयो ।

समितिले २ वटा डिपबोरिङ तथा १ सय ५० घनमिटरका २ वटा ट्याँकीमार्फत बोसिगाउँ क्षेत्रमा खानेपानी वितरण गरिरहेको छ ।