थानकोट । 

चाैथो थानकोट गोल्डकप फुटबल प्रतियोगिता अन्तर्गत क्वाटरफाइनल चरणका खेलहरू भोलि (शनिबार) बाट सुरू हुँदैछन् । 

प्रतियोगिताको पहिलो क्वाटरफाइनल खेलमा मध्यान्ह १२ बजे डिफेन्डिङ्ग च्याम्पियन वीआर ब्रदर्श ए टिम र थानकोट फुटबल क्लब भिड्नेछन् । वीआर ब्रदर्श ए टिम मिलन यूथ क्लबमाथि जित निकाल्दै क्वाटरफाइनल चरणमा प्रवेश गरेको थियो भने थानकोट एफसीले पहिलो खेलमा वाणस्थली यूथ समाज र दोश्रो खेलमा माटिखेल फुटबल क्लबलाई पराजित गर्दै अन्तिम आठमा स्थान बनाउन सफल भएको हो । 

यसैगरी प्रतियोगिताको दोश्रो क्वाटरफाइनल खेलमा ल्याक्टो लक्ष्य फुटबल क्लब र वीआर ब्रदर्श बी टिमबीच दिउँसो २ बजे खेल हुनेछ । 

वीआर ब्रदर्श बी टिमले प्रतियोगितामा पहिलो खेलमा ब्रदर्श यूनिटी तथा दोश्रो खेलमा किसिपिडी फुटबल क्लबमाथि जित हात पार्दै क्वाटरफाइनलमा प्रवेश गरेको हो भने ल्याक्टो लक्ष्य फुटबल क्लब घरेलु टोली गलबन युनाइटेड फुटबल क्लबमाथि सहज जित हात पार्दै अन्तिम ८ मा छनोट भएको हो । 

गत शनिबारबाट सुरू चाैथो थानकोट गोल्डकपका विजेताले नगद १ लाख रूपैयाँ, ट्रफी तथा मेडल प्राप्त गर्नेछन् । त्यस्तै, प्रतियोगिताको उपविजेता टोलीले ६० हजार रूपैयाँ नगद पुरस्कारको साथमा ट्रफी र मेडल हात पार्नेछन् ।

प्रतियोगिताको व्यक्तिगत विधातर्फका विजेताहरूले जनही पाँच हजार रूपैयाँ नगद तथा ट्रफी प्राप्त गर्नेछन् । प्रतियोगिताको व्यक्तिगत विधातर्फ उत्कृष्ठ खेल काैशल प्रदर्शन गर्ने खेलाडीहरूले  जनही ५ हजार रूपैयाँ नगद, ट्रफी र मेडल पाउनेछन् ।

खेल चन्द्रागिरि नगरपालिका-०३ थानकोट पिम्फलीस्थित गलबन फुटबल मैदानमा हुनेछन् ।