ढक, तराजु दर्ता तथा नविकरण शिविर आज चन्द्रागिरि नगरपालिका वडा नंं ०४ स्थित थानकोट स्थित वडा कार्यालय परिसरमा हुनेछ । शिविर बिहान १० देखी अपरान्ह ४ बजेसम्म सञ्चालन हुने नगरप्रवक्ता एवं वडा नं. ४ का कृष्णप्रसाद खड्गीले जानकारी दिनुभयो ।

यसअघि हिजो बुधबार चन्द्रागिरि-७ तथा मंगलबार चन्द्रागिरि-६ महादेवस्थानमा सो शिविर सञ्चालन भएको थियो ।

आम उपभोक्ताहरूको दैनिक जीवनयापनमा प्रत्यक्ष सरोकार राख्ने विषयसमेत रहेको हुँदा ढक तराजुको गुणस्तर जाँचको कार्यक्रम राखिएको चन्द्रागिरि नगरपालिका उद्योग वाणिज्य संघका अध्यक्ष कृष्णभक्त श्रेष्ठले जानकारी दिनुभयो । उहाँले ढक तराजुको दर्ता नविकरणले उपभोक्ताले गुणस्तरीय तथा उचित परिणाममा माल सामान खरिदको अधिकार थप सुरक्षित हुने बताउनुभयो । बजार अनुगमनका क्रममा ढक तराजुमा समेत त्रुटी भेटिएको उहाँले जानकारी दिनुभयो ।

यसपछि ढक तराजु दर्ता एवं नविकरण नगरी प्रयोगमा ल्याएको पाइएमा कानुनबमोजिम कारबाही हुने नगरपालिकाले जनाएको छ ।