थानकोट ।

अघिल्लो साता परेको अविरल वर्षाका कारण चन्द्रागिरि नगरपालिकाका धेरै स्थानमा भौतिक क्षति पुगेपछि त्यसको थप अध्ययन गर्न सङ्घीय सरकारको टोली प्रभावित स्थानमा आएको छ ।

चन्द्रागिरि-२ को माथिल्लो मसिने, तल्लो मसिने र ढुङ्गेनीमा बढी नोक्सान भएको नगरको वातावरण तथा विपद् व्यवस्थापन शाखाकी कर्मचारी भद्रा अर्यालले बताउनुभयो । उहाँका अनुसार “इन्द्रथान जाने सडक र कङ्काली माध्यमिक विद्यालयको आवसीय भवन परिसरमा सर्वाधिक क्षति भएको छ”।

चन्द्रागिरिमा पहिरो, तीन जनाको मृत्यु

निरीक्षणमा उनीसहित जलस्रोत तथा ऊर्जा मन्त्रालयका प्राविधिकहरु सहभागी थिए । कंकाली माध्यमिक विद्यालयका प्रधानाध्यापक विष्णुप्रसाद पनेरुले आवासीय भवन पछाडिको करिब ७५ फिट जमिन भासिँदा भवन नै जोखिममा परेको बताउनुभयो । “थप क्षति हुन नदिन तत्काल घेराबारा लगाउनुपर्ने स्थिति छ”, उहाँले भन्नुभयो ।

नगरपालिका-१३ र १५ मा डेढ सयभन्दा बढी घर डुबानमा परेको पनि अर्यालले जानकारी दिनुभयो । खासगरी खोला किनारका बस्तीहरुमा १७ वर्षयताकै सर्वाधिक ठूलो बाढी आएका कारण यस्तो डुबान भएको उहाँको भनाइ छ राससमा खबर छ । पानीले घना रूखबिरुवा भएका स्थानहरुमा समेत पहिरो गएका र कतिपय पहिराको सम्भावना नभएका बस्तीमा समेत घर जोखिममा पर्ने गरी पहिरो गएको उहाँले बताउनुभयो ।

थानकोट क्षेत्रमा वर्षा जारी, तटीय क्षेत्रहरू डुबानमा

नगरपालिकाको एक महत्पूर्ण पर्यटकीय स्थल इन्द्रथान जाने बाटोका दर्जनौँ स्थानमा पहिरो गएको र खुलाउनका लागि डोजर प्रयोग गरिएको छ। “आजसम्म पनि सबै स्थानको पहिरो पन्छाउन सकिएको छैन् । डोजरको सहायताले आवागमन खुलाउन खोजिरहेका छौँ”, अर्यालले भन्नुभयो ।

२१ असोजमा मसिनेमा पहिरो जाँदा एकै घरका तीन जनाको मृत्यु भएको थियो । नगरपालिकाले मृतकका परिवारलाई काजकिरिया खर्च एवं तत्कालीन राहतका रूपमा तत्कालै रु. ५० हजार दिने नगर प्रमुख घनश्याम गिरीले घोषणा गर्नुभएको थियो ।

मसिने पहिरो पिडितका लागि चन्द्रागिरि नगरको आर्थिक सहयोग