थानकोट ।

प्रथम मातातीर्थ गोल्डकप फुटबल प्रतियोगिता असोज ३ गतेबाट सुरू हुने भएको छ ।

प्रतियोगिताका बारेमा जानकारी दिन शनिबार मातातीर्थमा आयोजित पत्रकार सम्मेलनमा बोल्नुहुँदै आयोजक संस्था मातातीर्थ संरक्षण तथा विकास संस्थाका अध्यक्ष शान्त उदासले प्रथम मातातीर्थ गोल्डकप फुटबल प्रतियोगिताका विजेताले नगद २ लाख रूपैयाँ शिल्ड तथा प्रमाणपत्र पाउने जानकारी दिनुभयो । प्रतियोगिताका उपविजेताले नगद १ लाख रूपैयाँ तथा शिल्ड पाउने प्रतियोगितामा तेश्रो हुने टोलीले नगद ५० हजार रूपैयाँ हात पार्ने बताइएको छ ।

व्यक्तिगत विधा तर्फका अब्बल खेलाडीहरूले जनही १० हजार रूपैयाँ तथा ट्रफि हात पार्दा अनुशासित टिमले २० हजार रूपैयाँ प्रोत्साहन रकम पाउनेछ ।

चन्द्रागिरि नगरपालिका-०६ मातातीर्थस्थित फुटबल मैदानमा सञ्चालन हुने नकआउट फुटबल प्रतियोगिता ‘नाइन ए साइड फर्म्याट’ मा खेलाइने आयोजकले जानकारी दिएको छ । प्रतियोगिताको फाइनल असोज १७ गते खेलाइने बताइएको छ ।

प्रथम मातातीर्थ गोल्डकप फुटबल प्रतियोगिता आयोजनाका बारेमा जानकारी दिन आयोजित पत्रकार सम्मेलनमा बोल्नु हुँदै चन्द्रागिरि-६ का वडाध्यक्ष संजय सिग्देलले प्रतियोगिता चन्द्रागिरि क्षेत्रका फुटबल खेलाडीको प्रतिभा पहिचानका लागि महत्वपूर्ण हुनेमा आफु विश्वस्त रहेको धारणा राख्नुभयो ।

कार्यक्रममा बोल्नु हुँदै मातातीर्थ संरक्षण तथा विकास संस्थाका सल्लाहकार पुरूषोत्तम उदासले प्रतियोगिताले चन्द्रागिरि क्षेत्रको फुटबल विकासका लागि कोशेढुङ्गा साबित हुन सक्ने अपेक्षा राखेको बताउनुभयो । मातातीर्थ गोल्डकप आयोजक संस्थाका अध्यक्ष शान्त उदासले प्रतियोगिताले स्थानीय स्तरमा फुटबल खेलको विकास र विस्तारमा महत्वपूर्ण भूमिका खेल्ने धारणा राख्नुहुँदै आगामी वर्षहरूमा पनि यस प्रतियोगिता आयोजना गरिने जानकारी दिनुभयो । अध्यक्ष उदासले कोरोना भाइरस महामारीका कारण ठप्पजस्तै भएको यस क्षेत्रको खेलकुट गतिविधिलाई गति दिन प्रतियोगिता सफल हुने अपेक्षा लिएको धारणा व्यक्त गर्नुभयो ।

प्रतियोगितामा सहभागिताका लागि इच्छुकहरूले भदाै ३१ गतेभित्र टोली दर्ता गरिसक्नुपर्ने बताइएको छ ।