थानकोट ।

भुटानले महिला साफ च्याम्पियनसिपमा ऐतिहासिक जित निकालेको छ । सन् २०१० यता लगातार साफ च्याम्पियनसिपमा सहभागिता जनाइरहेको भुटानले पहिलो जित निकालेको छ । दशरथ रंगशालामा श्रीलंकालाई ५–० ले हराउँदै भुटानले ऐतिहासिक जित निकालेको हो ।

भुटानलाई ऐतिहासिक जित दिलाउन डेखी लाजोमले २ तथा नामङ्याल डेमा, छिरिङ लादेन, छिरिङ याङ्देनले समान १ गोल गरेकी थिइन् । योसँगै टोलीको सेमिफाइनल जाने सम्भावना बढेको छ । योसँगै टोलीको सेमिफाइनल जाने सम्भावना बढेको छ । साफ च्याम्पियनसिपको पहिलो संस्करणमा श्रीलंकासँग १–१ को बराबरी खेल्नुनै भुटानको यसअघिको सफल नतिजा थियो । शुक्रबारको जित अघि १४ खेलमा १ बराबरी खेलेको भुटानले १३ खेलमा हार बेहोरेको थियो । १४ खेलमा भुटानले ७७ गोल खादा ३ गोलमात्र गर्न सकेको थियो ।

भुटानको जितसँगै समूह बीमा सेमिफाइनल पुग्ने तीनै टोलीको सम्भावना खुला रहेको छ । समूह बीको पहिलो खेलमा नेपालले भुटानलाई ४–० ले हराएको थियो । श्रीलंकाले भने अर्को खेल भदौ २७ गते नेपालसँग खेल्ने छ । नेपाल र भुटानको समान ३ अंक भएको छ भने श्रीलंका अंक विहिन छ ।

समूह ए मा साबिक विजेता समेत रहेको भारतले र बंगलादेशले विजयी सुरुवात गरेका छन् । भारतले पाकिस्तानलाई र बंगलादेशले माल्दिभ्सलाई समान ३–० ले हराएको थियो । भारत च्याम्पियनसिपको सबै ५ संस्करणको विजेता हो । नेपालले भने ४ पटक फाइनल खेलेको छ । एक पटक बंगलादेश फाइनल पुगेको थियो ।